Surat Corporation : સુરત મહાનગરપાલિકાનું વર્ષ 2021 ની ચૂંટણીમાં ચૂંટાયેલા પ્રતિનિધિઓ કોર્પોરેટર તરીકે સ્થાપિત થયા બાદ ગઈકાલે તેમની ટર્મનો છેલ્લો દિવસ હતો. પરંતુ આ છેલ્લો દિવસ જાણે ચુંટાયેલા પ્રતિનિધિઓ કે હોદ્દેદારોનો પહેલો દિવસ હોય તેવો બની ગયો હતો. ગઈકાલે બપોર પછી પાલિકાના હોદ્દેદારો અને વિવિધ સમિતિના અધ્યક્ષ અને કોર્પોરેટરો આવ્યા ત્યારે શુભેચ્છકો મોટી સંખ્યામાં ઉમટી પડતા પાલિકા કચેરી હાઉસ ફુલ થઈ ગઈ હોય તેવો માહોલ થયો હતો.
પાલિકામાં ચુંટાયેલા પ્રતિનિધિઓની મેયર, ડેપ્યુટી મેયર, સ્થાયી સમિતિ અધ્યક્ષ શાસક પક્ષ નેતા કે વિવિધ સમિતિના ચેરમેનની નિમણૂક થાય ત્યારે શુભેચ્છકો ઉમટી પડતા હોય તે સામાન્ય દ્રશ્યો છે. પરંતુ સુરત પાલિકાના ચુટાયેલા પ્રતિનિધિઓ સહિત પદાધિકારીઓની ટર્મ પુરી થાય તે છેલ્લા દિવસે હોદ્દોગ્રહણ કર્યો હોય અને શુભેચ્છા આપવા શુભેચ્છક-ટેકેદારો આવી જાય તેવી રીતે પાલિકા કચેરીમાં શુભેચ્છાના મોહોલ જામ્યો હતો.
ચૂંટાયેલા કોર્પોરેટરો, વિવિધ સમિતિના અધ્યક્ષ અને પદાધિકારીઓને શુભેચ્છા આપનારા મોટી સંખ્યામાં આવી પહોંચ્યા હતા અને આગામી ટર્મમાં વધુ પ્રગતિ કરો તેવી શુભેચ્છાઓ પાઠવવામાં આવી હતી. આ શુભેચ્છકો માટે પદાધિકારીઓએ નાસ્તા-ભોજનની વ્યવસ્થા પણ કરી હતી. અનેક મહિલા કોર્પોરેટરની ટર્મના અંતિમ દિવસે રડી પડતા ભાવુક દ્રશ્યો સર્જાયા.
