Ahmedabad News : વિકાસની ગુલબાંગો વચ્ચે જનપ્રતિનિધિઓ તેમજ તંત્ર બાળકોના આરોગ્ય જેવા ગંભીર મુદ્દે કુંભકર્ણ નિંદ્રામાં પોઢતું હોય તેવું ચિત્ર વિધાનસભામાં રજૂ થયેલા આંકડા પરથી સર્જાયું છે. જેમાં જિલ્લાના તાલુકાની શાળામાં 5.17 લાખ બાળકોની તબીબી તપાસ કરાતા 22 ટકાથી વધુ બાળકો હૃદય, કિડની, કેન્સર, આંખ- કાન- નાક સહિતની કોઈ બીમારીથી પીડાતા હોવાનું બહાર આવ્યું છે. તેમાં પણ ગંભીર બાબત એ છે કે 360 બાળકોમાં હૃદયની બીમારી નોંધાઈ છે.
1.15 લાખ બાળકોમાં વિવિધ પ્રકારની બીમારી નોંધાઈ, 53 ટકા બાળકોને સારવાર માટે ખસેડાયા
અમદાવાદ જિલ્લામાં તાલુકાવાર ગત બે વર્ષમાં 1152 શાળાઓમાં 5,17,164 બાળકોની શાળા આરોગ્ય તપાસણી કાર્યક્રમ અંતર્ગત તબીબી તપાસ કરવામાં આવી હતી. જેમાં કુલ 1,15,949 બાળકોને કિડની, કેન્સર, હૃદય, આંખ, નાક, કાન, ગળા, પેટ, ચામડી સહિતના કોઈને કોઈ રોગ હોવાનું બહાર આવ્યું હતું. ગંભીર મુદ્દો એ છે કે આ પૈકી 360 બાળકો હૃદય રોગની બીમારી ધરાવતા હતાં. જેમાં સૌથી વધારે બાળકોની સંખ્યા દસક્રોઈ અને સાણંદ તાલુકામાંથી હતી. એટલું જ નહીં બીમારી ધરાવતા કુલ બાળકોના 53 ટકા એટલે કે 61,317 બાળકોને રેફરલ તેમજ તજજ્ઞીય સારવાર માટે ખસેડવાની નોબત આવી હતી. બાળ આરોગ્ય માટે આટ-આટલી યોજનાઓ અમલમાં હોવા છતાં આ આંકડા બાળ આરોગ્યની સ્થિતિ કથળતી હોય તેવો ચિતાર આપી રહ્યા છે.
હૃદયની બીમારીવાળા કુલ પૈકી 50 ટકા બાળકો ઔદ્યોગિક વિસ્તારમાં
અમદાવાદમાં હૃદય રોગની બીમારી ધરાવતા કુલ બાળકોમાં 50 ટકાથી વધુ એટલે કે 183 બાળકો દસક્રોઈ અને સાણંદ તાલુકામાં છે. આ કોઈ આક્ષેપબાજી નથી પરંતુ ખુદ આરોગ્ય મંત્રીએ વિધાનસભામાં રજૂ કરેલા આંકડા છે. ત્યારે નોંધનીય બને છે કે આ બંને તાલુકામાં ખૂબ મોટા પ્રમાણમાં કેમિકલ, ફાર્મા, ઓટોમોબિલ સહિતના ફિલ્ડને લગતો ઇન્ડસ્ટ્રિયલ વિસ્તાર આવેલો છે.
આંકડો હજી પણ મોટો હોઈ શકે છે
અત્રે એ પણ ઉલ્લેખનીય બને છે કે આ માત્ર શાળાકીય તપાસમાં બહાર આવેલા આંકડા છે. આમાં શહેરી વિસ્તારની શાળામાં ભણતાં બાળકોનો ઉમેરો કરાયો છે કે નહીં તે બાબતે સ્પષ્ટતા કરાઈ નથી. ત્યારે આ સિવાયના બાળકોની પણ તબીબી તપાસ થાય તો આંકડો હજુ વધુ ચોંકાવનારો હોવાની સંભાવના છે.
