Hardik Pandya And Ishan Kishan Insulting National Flag: ટી 20 વર્લ્ડ કપમાં ક્રિકેટર હાર્દિક પંડ્યા અને ઈશાન કિશને કરેલી ઉજવણીના દ્રશ્યો પર કથિત વિવાદ સર્જાયો છે. રાષ્ટ્ર ધ્વજના કરેલા અપમાન અંગે વડોદરાના કારેલીબાગ પોલીસ મથકે રિપબ્લિકન પાર્ટીના અગ્રણી શૈલેષ શુક્લ અને રાજેશ કુમાર ગોયલે પોલીસ ફરિયાદ નોંધવા અરજી કરી છે.
શરીર પર તિરંગો લપેટીને ગર્લફ્રેન્ડ સાથે અતરંગ પોઝ આપ્યા હોવાનો દાવો
ટી20 વર્લ્ડ કપની ફાઈનલમાં ભારતની થયેલી જીત બાદ તમામ ભારતીય પ્લેયરો શાનદાર ઉજવણીમાં વ્યસ્ત હતા, ત્યારે શરીર પર કથિત રીતે તિરંગો બાંધીને હાર્દિક પંડ્યા અને ઈશાન કિશને તેની ગર્લફ્રેન્ડ સાથે રાષ્ટ્રધ્વજ શરીર પર લપેટીને અતરંગ ફોટા પડાવ્યા હતા.
પોલીસમાં કરવામાં આવેલી અરજીમાં મુખ્ય ત્રણ મુદ્દા
રાષ્ટ્રીય ધ્વજનું અપમાન
એવો આક્ષેપ છે કે રાષ્ટ્રીય ધ્વજને શરીર પર લપેટીને તેની ગરિમા વિરુદ્ધ નાચવું અને તેને પગ સુધી લઈ જવો એ પ્રોટોકોલનું ઉલ્લંઘન છે.
જાહેરમાં અશ્લીલતા
સ્ટેડિયમ જેવા ગીચ જાહેર સ્થળે લિપ-કિસિંગ (ચુંબન) જેવા કૃત્યો કરવા બદલ જાહેર શાલીનતાના ભંગનો આરોપ લગાવવામાં આવ્યો છે.
મહિલા પ્રત્યે અશોભનીય વર્તન
વીડિયોમાં એક મહિલા સાથે શારીરિક નિકટતા અને ચુંબન જેવું વર્તન દેખાય છે. આ બાબતે મહિલાની સંમતિ હતી કે નહીં તે અંગે તપાસની માંગ કરવામાં આવી છે.
શું છે સમગ્ર મામલો?
હાર્દિક પંડ્યા એ તો એક જગ્યાએ સૂતા સૂતા ફોટોગ્રાફરોને વિવિધ પોઝ આપ્યા હતા અને ભારતીય તિરંગાનું હળાહળ અપમાન કર્યું હતું. પરિણામે દેશના અનેક રાજ્યમાં ક્રિકેટર હાર્દિક પંડ્યા સામે તિરંગાના અપમાનની ફરિયાદો થઈ હતી.
હાર્દિક પંડ્યા મુશ્કેલીમાં મુકાઇ શકે
ભારતની ઐતિહાસિક જીત બાદ સોશિયલ મીડિયા પર હાર્દિક પંડ્યાના ઉજવણીના અનેક વીડિયો વાયરલ થયા હતા. 13 માર્ચે પુણેના એડવોકેટ વાજિદ ખાન બિડકરે જણાવ્યું કે, ‘રાષ્ટ્રીય સન્માનના અપમાન નિવારણ અધિનિયમ, 1971’ ની કલમ 2 મુજબ, રાષ્ટ્રધ્વજની ગરિમા જાળવવી અનિવાર્ય છે. ઉજવણીમાં મશગૂલ પંડ્યા તિરંગો શરીર પર હોવા છતાં ગર્લફ્રેન્ડ સાથે સ્ટેજ પર સૂતેલા જોવા મળ્યા હતા, જે ધ્વજનું અપમાન છે.
બીજી તરફ હાથરસના એડવોકેટ વિશ્વપ્રતાપ સિંહ રાણાએ પણ એસપી અને કેન્દ્રીય ગૃહમંત્રીને પત્ર લખીને કડક કાર્યવાહીની માંગ કરી છે. આ ઉપરાંત મહારાષ્ટ્રના પુણે ખાતે શિવાજી નગર પોલીસ સ્ટેશનમાં એડવોકેટ વાજિદ ખાન દ્વારા ફરિયાદ દાખલ કરાવવામાં આવી છે. આ ઉપરાંત કેટલાક અહેવાલો અનુસાર બેંગ્લુરૂ ખાતે પણ લેખિત અરજી આપવામાં આવી છે. હાર્દિક પંડ્યા અગાઉ પણ પોતાની લાઈફસ્ટાઈલ અને નિવેદનોને કારણે ચર્ચામાં રહ્યા છે, પરંતુ રાષ્ટ્રધ્વજ સાથે જોડાયેલો આ વિવાદ તેમના માટે કાયદાકીય મુશ્કેલીઓ ઊભી કરી શકે છે.
