‘સલામત ગુજરાત’માં વિમેન્સ ડે મનાવાયાના ચોથા જ દિવસે 2 પરિચિત વિસાવદરથી બાઈક પર લઈ ગયા હતા : મોણવેલની સીમમાં રાતભર ગોંધી રાખીને હેવાનિયત : 6 શખ્સ રાઉન્ડ અપ
જૂનાગઢ, : જેતપુર પંથકમાં રહેતી એક મહિલાને મોણવેલના શખ્સે વિસાવદર બોલાવ્યા બાદ બે શખ્સોએ બાઈક પર અપહરણ કરી મોણવેલની સીમમાં લઈ જઈ ગોંધી રાખી હતી, જ્યાં છ શખ્સોએ સામુહિક દુષ્કર્મ આચર્યું હતું. બાદમાં આ અંગે તેણીએ ફરિયાદ કરતાં પોલીસે દુષ્કર્મ, એટ્રોસિટી સહિતની કલમ મુજબ ગુનો દાખલ કરી છ શખ્સોને રાઉન્ડ અપ કરી વધુ પૂછપરછ હાથ ધરી છે.
પોલીસમાંથી પ્રાપ્ત વિગત મુજબ, જેતપુર પંથકમાં રહેતી અને કેટરર્સમાં કામ કરતી પરિણીતાને મોણવેલના મુન્ના ભરવાડ સાથે પરિચય હતો. ગત તા.૧૨ના આ મહિલા વિસાવદર આવી હતી. મુન્નો અને એક અન્ય શખ્સ મહિલાને વિસાવદર બસસ્ટેન્ડથી બાઈકમાં બેસાડી ધારી તાલુકાના મોણવેલની સીમમાં લઈ ગયા હતા. ત્યાં મુન્ના ભરવાડ, ચાર અજાણ્યા શખ્સ અને એક ચોક્કસ મોબાઈલ નંબરના ધારકે મહિલાને ગોંધી રાખી સામૂહિક દુષ્કર્મ આચર્યું હતું. તા.૧૨ના રાત્રીના ૧૦ વાગ્યાથી તા.૧૩ના સવારે પાંચ વાગ્યા દરમ્યાન બનેલી આ ઘટના બાદ આ શખ્સોએ મહિલાને મુક્ત કરી હતી. બાદમાં આ મહિલા વિસાવદર સરકારી હોસ્પિટલમાં દાખલ થઈ હતી અને તેણીએ સમગ્ર આપવિતી જણાવતા સૌ કોઈ ચોકી ઉઠયા હતા.
આ અંગે જાણ થતાં ધારી અને વિસાવદર પોલીસ વિસાવદર હોસ્પિટલ ખાતે પહોંચી હતી અને મહિલાએ આપેલાં નિવેદન બાદ વિસાવદર પોલીસે મુન્ના ભરવાડ, ચોક્કસ મોબાઈલ નંબરધારક અને અન્ય ચાર અજાણ્યાં શખ્સો સામે સામૂહિક દુષ્કર્મ, એટ્રોસિટી મુજબ ગુનો દાખલ કર્યો હતો. આ અંગે એસ.સી- એસ.ટી. સેલના ઈન્ચાર્જ ડીવાયએસપી હિતેષ ધાંધલ્યાએ તપાસ હાથ ધરી છે. તેમણે જણાવ્યું હતું કે જેની સામે ફરિયાદ દાખલ થઈ છે તે તમામ છ શખ્સને રાઉન્ડ અપ કરી તેમની ઓળખ પરેડ કરવા તજવીજ હાથ ધરવામાં આવી છે.
