લાલચ બુરી બલા : મોરબીના વેપારી સાથે સાયબર ફ્રોડ 4 શખ્સો વિરૂદ્ધ સાયબર ક્રાઇમ પોલીસ મથકમાં ફરિયાદ
મોરબી, : સાયબર ફ્રોડના એક બાદ એક બનાવો પ્રકાશમાં આવી રહ્યા છે. મોરબીમાં રહેતા વેપારીને શેરબજારમાં લોભામણી લાલચો આપી ટ્રેડીંગ કરાવ્યું હતું અને રૂ. 1.11 કરોડનો નફો થયાની જાણ કરી રકમ વિડ્રો કરવા માટે રૂ.૫૦ લાખથી વધુની રકમનું ટ્રાન્ઝેક્શન કરાવી તે રકમ પચાવી પાડવામાં આવતા સાયબર ક્રાઇમ પોલીસ મથકમાં 4 શખ્સો સામે ફરિયાદ નોંધાવાઇ છે.
મોરબીના બાયપાસ રોડ પર સીતારામ પેલેસમાં રહેતા જતીનભાઇ ચતુરભાઇ કુંડારિયા (ઉ.વ. 43)એ આરોપી 4 આઇડી ધારકો તેમજ તપાસમાં ખુલે તે આરોપીઓ વિરૂદ્ધ ફરિયાદ નોંધાવી છે કે આરોપીઓએ ગુનાહિત કાવતરૂં રચી ટેલીગ્રામ પર ઓનલાઇન ટ્રેડીંગ કરી પૈસા કમાવવા અંગે મેસેજથી વાતચીત કરી લોભામણી સ્કીમો આપી વિશ્વાસ કેળવી અમૂક રકમનો લાભ કરાવી વિશ્વાસમાં લીધા હતા. બાદમાં વાતચીત કરી આઇડી આપી તેમાં ફરિયાદી દ્વારા ઓનલાઇન શેર બજારમાં રોકાણ કરતા તેને રૂ 1,11,99,751નો નફો થયાની જાણ કરી હતી અને રકમ વિડ્રો કરવા માટે અલગ-અલગ ટેક્સ, કમિશન અને ડોક્યુમેન્ટ ચાર્જના બહાના હેઠળ રૂ.૫૦,૧૪,૬૦૩ અલગ-અલગ યુપીઆઇ આઇડી અને બેંક એકાઉન્ટમાં રૂપિયાનું ટ્રાન્ઝેક્શન કરાવી તે રકમ ઓળવી ગયા હતા.
ભોગ બનનાર વેપારીએ શરૂઆતમાં રૂ. 5000 ડીપોઝીટ કરી ટ્રેડીંગ કર્યું અને નફો થતા રૂ. 500, રૂ. 1100, રૂ. 1500 અને રૂ. 1200 સહિત કુલ રૂ. 4300 વિડ્રો કર્યા હતા. બાદમાં એજન્ટે ટેલીગ્રામ આઇડી આપેલ જેમાં વેપારીએ પોતાનું અને પત્નીના યુપીઆઇ આઇડીથી ટુકડે-ટુકડે રૂ. 3,50,000 ડીપોઝીટ કરી ટ્રેડીંગ કર્યું હતું. પ્રોફીટ ચેક કરતા રૂ. 1,11,99,751 બેલેન્સ બતાવતા હતા. જે વિડ્રો કરતા થઇ ના હતી. આરોપી સમીર ગુપ્તા નામના આઇડી ધારક સાથે વાત કરતા રકમ વિડ્રો કરવા ટેક્સ, કમિશન આપવું પડશે કહીને રકમ પડાવી હતી અને કુલ રૂ. 50,14,603ની ઓનલાઇન ઠગાઇ કર્યાની ફરિયાદ નોંધાવી છે.
