અમદાવાદ, ગુરુવાર
વા વાયાથી નડીયું ખસ્યું તે દેખીને કૂતરું ભસ્યું કોઇક કહે મેં નજરે દીઠો ચોર આખાના છપ્પાને સાર્થક કરતો કિસ્સો નરોડામાં પ્રકાશમાં આવ્યો છે. જેમાં નરોડા હંસપુરા પાસે દેવનંદન સંકલ્પ સિટી સોસાયટીમાં માનવતાને શરમાવે તેવો બનાવ સામે આવ્યોે છે, જ્યાં યુવક ગલુડિયાને રમાડતો હતો આ સમયે કૂતરી આવીને ભસવા લાગતાં તે ડરીને સોસાસયટીમાં ભાગ્યો હતો ત્યાં હાજર મહિલાએ છોકરા ઉપાડવા આવ્યા હોવાની બુમો પાડતાં સ્થાનિક લોકોએ યુવકને ઢોર માર્યો હતો. આ બનાવમાં અફવાના કારણે નિર્દોષ યુવકને બાળકો ઉપાડી જનારો બાળ ચોર સમજીને માર્યો હતો. આ બનાવ અંગે નરોડા પોલીસે મહિલા સહિત પાંચ લોકો સામે ગુનો નોંધીને વધુ તપાસ હાથ ધરી છે.
અફવાના પગલે સોસાયટીના રહીશોએ નિર્દોષ યુવકને બાળ ચોર સમજીને ઢોર માર મારતા નરોડા પોલીસે મહિલા પાંચ સામે ગુનો નોંધી તપાસ શરુ કરી
ગાંધીનગરના દહેગામના યુવકે નરોડા પોલીસ સ્ટેશનમાં નરોડા હંસપુરા પાસે યુવક તથા મહિલા સહિત પાંચ લોકો સામે ફરિયાદ નોંધાવી છે કે તા. ૧૪-૦૩-૨૦૨૬ના રોજ તેઓ તેમના પરિચિત લોકો તથા અને તેમના પુત્ર સાથે રિક્ષામાં સિમકાર્ડ લેવા હરિદર્શન ચાર રસ્તા ગયા હતા.
ત્યાંથી પરત ફરતી વખતે હંસપુરા પાસે દેવનંદન સંકલ્પ સિટી પાસે રિક્ષા ઉભી રાખી ફરિયાદી તથા તેમના મિત્ર ગલુડિયાને રમાડતા હતા જ્યાં કૂતરી ભસતા ડરના માર્યા મિત્ર સોસાયટીની અંદર ભાગ્યો હતો. તેને લેવા માટે ફરિયાદી યુવક સોસાયટીની અંદર ગયા ત્યારે ત્યાં હાજર એક મહિલાએ સોસાયટીમાં છોકરા ઉપાડવા વાળો આવ્યો છે તેવી બુમો પાડતા સોસાયટીના સભ્યો ભેગા થયા હતા. સત્ય જાણ્યા વગર જ ટોળાએ યુવક ઉપર હુમલો કરી ને ઢોર માર માર્યો હતો જો કે સારવાર કરાવ્યા બાદ યુવકે પોલીસમાં ફરિયાદ કરી હતી.
