બુલેટ ટ્રેન પ્રોજેક્ટ હેઠળની જમીન સંપાદન પ્રક્રિયામાં ઠગાઈનો કેસ સામે આવ્યો છે.રૂ. ૨ કરોડથી વધુની છેતરપિંડીના મામલે પોલીસે આરોપીની ધરપકડ કરી કોર્ટમાં રજૂ કરતા કોર્ટે આરોપીના ચાર દિવસના રિમાન્ડ મંજૂર કર્યા છે.
ફરિયાદી સલમાન પટેલ (રહે. તાંદલજા) તથા તેમની યુનિક ડેવલપર્સ પેઢીના ભાગીદારોએ મૂળ જમીન માલિકો સાથે સમજૂતી કરાર કરીને અકોટા વિસ્તારમાં રેવન્યૂ સર્વે નંબર ૮, ૯, ૧૩ અને ૧૪ની જમીન રૂ.૨,૭૨,૫૬,૨૭૦માં ખરીદી હતી. રકમ ચૂકવ્યા છતાં આરોપીઓએ કાવતરું ઘડી વિશ્વાસઘાત કર્યો હતો.
તપાસમાં બહાર આવ્યું છે કે, યુનિક ડેવલપર્સ તરફથી ભાગીદાર હસન પટેલને આપવામાં આવેલા કુલમુખત્યારનામાનો દુરુપયોગ કરી, તેણે જમીન માલિકો ઇલ્યાસ અલ્લી બાપુ અને જુબેર મુસા બાબર સાથે મળી બોગસ પેઢીનામું તૈયાર કર્યું હતું. આ ખોટા દસ્તાવેજો સીટી સર્વે અને બુલેટ ટ્રેન પ્રોજેક્ટમાં રજૂ કરીને જુબેરના ખાતામાં રૂ.૧.૬૬ કરોડ જમા કરાવવામાં આવ્યા હતા.
આ રકમમાંથી હસનપટેલે રૂ.૪૭.૯૩ લાખ પોતાના ખાતામાં ટ્રાન્સફર કર્યા હતા, જ્યારે મૂળ જમીન માલિક ગુલામમહંમદ નુરમીયા શેખે રૂ.૩૪.૧૫ લાખ મેળવ્યા હતા. આ રીતે તમામ આરોપીઓએ મળીને કુલ રૂ.૨,૦૦,૭૬,૭૯૮ની ઠગાઈ આચરી હોવાનું સામે આવ્યું છે.
બુલેટ ટ્રેન પ્રોજેક્ટ માટે જમીન સંપાદન અંગે જાહેરનામું પ્રસિદ્ધ થયા બાદ વધુ વળતર મેળવવા માટે સર્વ નંબર દાવામાંથી હટાવવાના પુરસીસ દાખલ કરી વિશ્વાસઘાત કરાયો હતો. ફરિયાદી અને પેઢીની જાણ બહાર સોગંદનામું આપી વળતર પર કોઈ વાંધો નથી તેવું દર્શાવવામાં આવ્યું હતું.
અકોટા પોલીસે હસનની ધરપકડ કરી બાકી રહેલા આરોપીઓની ધરપકડ માટે ચક્રો ગતિમાન કર્યા છે.
