image : Freepik
Jamnagar Loot Case : જામનગર જિલ્લાના ધ્રોલ તાલુકાના ખારવા ગામના નિવૃત્ત શિક્ષક ધ્રોલની બેન્ક ઓફ બરોડામાં દોઢ લાખની રોકડ રકમ ઉપાડવા માટે આવ્યા હતા, અને તે રકમ લઈને બાઈકમાં બેસીને ઘેર પરત ફરવા જતાં તેની રોકડ સાથેની થેલી લઈને ગઠિયો છું મંતર થયો હતો. જે અંગે પોલીસ ફરિયાદ નોંધાવી છે. પોલીસે સીસીટીવી કેમેરાના આધારે તસ્કરને પકડવા માટેની કવાયત શરૂ કરી છે.
આ બનાવની વિગત એવી છે કે ધ્રોલ તાલુકાના ખારવા ગામમાં રહેતા અને અગાઉ શિક્ષક તરીકે નોકરી કરીને નિવૃત્ત થયેલા તેમજ હાલ ખેતી કામ સંભાળતા હંસરાજભાઈ થોભણભાઈ ઘેટીયા (ઉ-71), કે જેઓ પોતાના ખાતામાં રહેલી દોઢ લાખની રોકડ રકમ ખેતીના કામમાં ઉપયોગમાં લેવા માટે ધ્રોળની બેન્ક ઓફ બરોડાની બ્રાન્ચમાં આવ્યા હતા. ગઈકાલે સવારે 10.30 વાગ્યાના અરસામાં બેંકમાંથી રૂપિયા દોઢ લાખની રકમ ઉપાડીને તેણે એક પર્ષમાં રાખીને થેલીમાં મૂકી દીધી હતી, જે થેલી તેણે પોતાના બાઈકના પાછળના હુકમા ટીંગાળી હતી, અને બાઈક પર બેસીને તેઓ ઘેર પરત ફરી રહ્યા હતા. જે દરમિયાનમાં પાછળથી તેની થેલી એકાએક ગુમ થઈ હતી, અને પોતાની રોકડ રકમ ચોરાઈ ગઈ હોવાનું ધ્યાનમાં આવતાં દેકારો કરી મૂક્યો હતો. પોતાના પુત્ર વગેરેને ધ્રોલ બોલાવી લીધા બાદ આખરે મામલો ધ્રોલ પોલીસ મથકમાં લઈ જવાયો હતો, અને અજાણ્યા તસ્કર સામે પોતાની રૂપિયા દોઢ લાખની રોકડ રકમ ચોરી જવા અંગેની ફરિયાદ નોંધાવી હતી.
જે ફરિયાદના અનુસંધાને ધ્રોળના પોલીસની ટીમ બનાવના સ્થળે પહોંચી ગઈ હતી અને સૌ પ્રથમ બેંકના સીસીટીવી કેમેરા ચેક કર્યા હતા. જેમાં ફરિયાદીની નજીકમાં એક શખ્સ કે જે લાંબા વાળ વાળો અને પેન્ટ શર્ટ પહેરેલો તેની રેકી કરી રહ્યો હોય, તેવું જોવા મળ્યું હતું. જેણે હંસરાજભાઈનો પીછો કર્યો હતો, અને તેઓએ બાઈકમાં જેવી રોકડ ભરેલી થેલી પાછળ ટીંગાળી અને બાઈક ચાલુ કરી રહ્યા હતા, જે દરમિયાન પાછળથી થેલી આંચકીને પોતે ભાગી છૂટ્યો હતો. જે પણ બહારના સીસીટીવી કેમેરામાં દેખાયો હતો. આથી ધ્રોળ પોલીસે પેન ડ્રાઈવમાં અંદર અને બહારના સીસીટીવી કેમેરાના ફુટેજ મેળવી લીધા બાદ તેના વર્ણનના આધારે તસ્કરને શોધી કાઢવા માટેની કવાયત હાથ ધરી છે.
