– બ્લેક મન્ડે : શેરબજાર, રૂપિયો, સોનુંચાંદી, ક્રૂડ બધું જ કડડડભૂસ
– બજારમાંથી સોમવારે 14 લાખ કરોડની મૂડીનું ધોવાણ થતાં રોકાણકારો રાતાપાણીએ રોયા
– ઇરાન-અમેરિકા યુદ્ધના કારણે ભારતના એક વર્ષના બજેટ જેટલી રકમ શેરબજારમાંથી સાફ થઈ ગઈ
– માર્ચમાં સોનામાં 50 વર્ષનો સૌથી મોટો 20 ટકાનો કડાકો, એમસીએક્સ પર ગોલ્ડ-સિલ્વર બંનેમાં લોઅર સર્કીટ લાગી
નવી દિલ્હી: મધ્યપૂર્વમાં ઇરાન-અમેરિકા અને ઇઝરાયેલ વચ્ચે યુદ્ધ શરુ થયા પછી શેરબજારમાં ૪૮.૨૯ લાખ કરોડ રૂપિયાનું ધોવાણ થઈ ચૂક્યું છે. મહિનાથી પણ ઓછા સમયમાં આવેલો આ ઘટાડો ભારતના એક વર્ષના બજેટ જેટલો છે.આમ ભારતીય શેરબજાર ફાઇટર જેટ યુદ્ધમાં નીચે ખાબકે તેના કરતાં પણ વધુ ઝડપે નીચે ખાબક્યું છે. સેન્સેક્સ મે ૨૦૨૨ પછી પહેલી વખત ૭૨ હજારના સ્તરે જોવા મળ્યો છે.
બીએસઇનું માર્કેટ કેપિટલાઇઝેશન ૪૮.૨૯ લાખ કરોડ ઘટીને રૂ. ૪૧૫ લાખ કરોડ થઈ ગયું છે. બીએસઈ સેન્સેક્સ માર્ચ મહિનામાં ૧૦.૫૬ ટકા એટલે કે ૮,૬૦૦ પોઇન્ટ ઘટયો છે અને નિફ્ટી ૨,૬૬૬ પોઇન્ટ એટલે કે ૧૦.૫૮ ટકા ઘટયો છે.
આનો સીધો અર્થ એમ થાય કે શેરબજાર બે વર્ષના નીચલા સ્તરે જોવા મળી રહ્યું છે.બીએસઈ સેન્સેક્સ સોમવારે ૧૮૩૬ પોઇન્ટ ઘટતા ૭૨,૬૯૬ પોઇન્ટ પર બંધ આવ્યો હતો. આ ઘટાડાના લીધે શેરધારકોને ૧૪ લાખ કરોડનો ફટકો પડયો છે.જ્યારે નિફ્ટી ૬૦૨ પોઇન્ટ ઘટીને ૨૨,૫૧૩ પોઇન્ટ પર બંધ આવ્યો હતો.
અમેરિકા અને ઇઝરાયેલે ઇરાન પર હુમલા કરીને તેના લીડર આયતોલ્લાહ ખામેનેઈને ઠાર કર્યા પછી ખાડી યુદ્ધે દિવસો વીતતા જવાની સાથે વધુને વધુ ભીષણ બન્યું છે.લશ્કરી હુમલાના પગલે ઇરાને પણ અમેરિકાના લશ્કરી મથકો પર અને ઇઝરાયેલ પર શ્રેણીબદ્ધ હુમલા કર્યા છે. તેની સાથે તેણે અમેરિકાના સહયોગી દેશો પર પણ હુમલા કર્યા છે. તેમા યુએઈ, બહેરીન, કુવૈત, જોર્ડન અને સાઉદી અરેબિયાનો સમાવેશ થાય છે.
દુનિયામાં સામાન્ય રીતે યુદ્ધના સમયમાં સોનું અને ચાંદી પર રોકાણકારો વિશ્વાસ મૂકતા હોય છે, પરંતુ સોમવારે વિશ્વના બજારોમાં સોના-ચાંદી, ક્રૂડ ઓઇલમાં ગાબડા પડયા હતા. અમેરિકા, ઈઝરાયેલ અને ઈરાનનું યુદ્ધ શરૂ થયા પછી માર્ચમાં સોનામાં પણ ૨૦ ટકાનો ઐતિહાસિક કડાકો બોલાયો છે, જે છેલ્લા ૫૦ વર્ષમાં જોવા મળ્યો નથી. આથી સોનામાં રોકાણકારો પાયમાલ થઈ ગયા છે.
વૈશ્વિક બજારમાં સોનું હાલ ૪,૨૬૩ ડોલરની આસપાસ ટ્રેડ કરી રહ્યું છે. ભારતીય હાજર બજારમાં સોનું પ્રિત ૧૦ ગ્રામ ૯,૦૦૦ રૂપિયા જેટલું તૂટયા પછી એક સમયે ૧૦ ગ્રામ દીઠ ૧.૩૪ લાખ પર પહોંચી ગયુ હતુ. જો કે મોડી સાંજે ઉછળીને ૧.૪૦ લાખે પર આવ્યું હતું. જ્યારે ચાંદીના ભાવ એક સમયે પ્રિત કિલો ૨.૨૫ લાખથી ગગડીને ૨.૦૧ લાખ થયા પછી પાછા વધીને પ્રતિ કિલો ૨.૨૪ લાખ થયા હતા.
આ સિવાય એમસીએક્સમાં સોમવારે ટ્રેડિંગ સમયે ચાંદીના ભાવ બે લાખ રૂપિયાથી નીચે ગગડી ગઈ હતી જ્યારે સોનામાં ૧૦ ટકાની લોઅર સર્કિટ લાગી હતી, જેથી સોનાના ભાવ ૧૪,૦૦૦ તૂટીને પ્રતિ ૧૦ ગ્રામ રૂ. ૧.૩૦ લાખથી નીચે પહોંચી ગયા હતા.
આ જ રીતે ક્રૂડ ઓઇલનો ભાવ પ્રતિ બેરલ ઊંચામાં ૧૧૪ ડોલર થયા પછી નીચામાં ૯૬ ડોલર થયો હતો. રુપિયો પણ નીચામાં ૯૩.૯૮ થઈ એટલે કે લગભગ ૯૪ રૂપિયા થઈ ઉચકાયો હતો. આમ રૂપિયાએ તેના અગાઉના ૯૩.૭૩ના રેકોર્ડને તોડી નાખ્યો હતો. આમ રૂપિયો હવે ૯૩થી ૯૪ની રેન્જમાં ટ્રેડ થતો જોવા મળી શકે છે.
|
અમદાવાદ સોના-ચાંદી |
|
|
સોનું |
૧,૪૦,૫૦૦ |
|
|
૮,૦૦૦ |
|
ચાંદી |
૨,૧૫,૦૦૦ |
|
|
૧૩,૦૦૦ |
