સ્થાનિક સ્વરાજ્યની સંસ્થાઓ માટે ધમધમાટ
દહેગામ તાલુકા પંચાયતમાં 1.80 લાખ, માણસામાં 1.79 લાખ તથા કલોલ તાલુકા પંચાયતમાં 1.26 લાખ મતદારોનો સમાવેશ
ગાંધીનગર: રાજ્ય ચૂંટણી આયોગ દ્વારા ગુજરાતમાં આગામી સ્થાનિક સ્વરાજ્યની ચૂંટણીઓની તૈયારીઓ તેજ કરી દેવામાં આવી છે. આ પ્રક્રિયાના ભાગરૂપે ગાંધીનગર જિલ્લામાં મતદાર યાદી તૈયાર કર્યા બાદ તેની પ્રાથમિક પ્રસિદ્ધિ કરવામાં આવી છે. ગાંધીનગર જિલ્લા પંચાયત સહિત કલોલ, માણસા અને દહેગામ તાલુકા પંચાયતની ચૂંટણીઓ આગામી દિવસોમાં યોજાવાની હોવાથી મતદારોની સંખ્યા અને વિગતો જાહેર કરવામાં આવી છે.
પ્રાથમિક પ્રસિદ્ધિ મુજબ ગાંધીનગર જિલ્લા પંચાયતમાં કુલ ૬.૬૮ લાખ મતદારો નોંધાયા છે. જેમાં પુરુષ મતદારોનું વર્ચસ્વ જોવા મળ્યું છે. વિગતવાર આંકડા જોઈએ તો, ગાંધીનગર જિલ્લા પંચાયતમાં એટલે કે ગાંધીનગર, કલોલ,દહેગામ, અને માણસા ચારેય તાલુકામાં થઈને કુલ મતદારોનિ સંખ્યા ૬.૬૮ લાખ છે જે પૈકી ૩.૪૪ લાખ પુરુષ મતદારો, ૩.૨૩ લાખ મહિલા મતદારો તથા ૨૨ અન્ય મતદારોનો સમાવેશ થાય છે.
ચૂંટણી તંત્ર દ્વારા ગાંધીનગર જિલ્લાના કલોલ દહેગામ અને માણસા તાલુકા પંચાયતોમાં પણ ચૂંટણીને અનુલક્ષીને મતદાર યાદીની પ્રાથમિક પ્રસિધ્ધિ કરવામાં આવી છે.માણસા તાલુકા પંચાયતમાં ૧,૭૯,૨૧૧ મતદારો નોંધાયા છે, જેમાં ૯૨,૯૪૫ પુરુષો અને ૮૬,૨૬૩ મહિલાઓનો સમાવેશ થાય છે. જ્યારે દહેગામ તાલુકા પંચાયતમાં કુલ ૧,૮૦,૪૨૮ મતદારો મતાધિકાર ધરાવે છે, જેમાં ૯૨,૫૨૫ પુરુષ અને ૮૯,૮૯૬ મહિલા મતદારો છે.તો કલોલ તાલુકા પંચાયતમાં કુલ ૧,૨૬,૮૬૦ મતદારો નોંધાયા છે, જેમાં ૬૫,૯૦૦ પુરુષો અને ૬૦,૯૫૮ મહિલાઓ યાદી પ્રમાણે હોવાનું સામે આવી રહ્યું છે.
હાલમાં આ યાદી પ્રાથમિક તબક્કે પ્રસિદ્ધ કરવામાં આવી છે. જો કોઈ મતદાર કે રાજકીય પક્ષને આ યાદી સામે કોઈ વાંધો હોય અથવા નામમાં સુધારો કરવા જેવી વિગતો હોય, તો તેઓ ચૂંટણી તંત્ર સમક્ષ રજૂઆત કરી શકશે. આ વાંધા અને દાવાઓના નિકાલ બાદ આગામી તારીખ ૩૦મીએ મતદાર યાદીની આખરી પ્રસિદ્ધિ કરવામાં આવશે, જેના આધારે જ ચૂંટણીની પ્રક્રિયા આગળ વધશે. આમ, ગાંધીનગર જિલ્લામાં સ્થાનિક સ્વરાજ્યની સંસ્થાઓમાં સત્તાના સમીકરણો રચવા માટે મતદારો તૈયાર છે અને વહીવટી તંત્ર પણ હવે આખરી ઓપ આપી રહ્યું છે.
