ચાલકની સ્થળ પરથી અટકાયત કરાઇ
રિક્ષા અને કારમાં પણ નુક્સાની, અકસ્માતને પગલે સ્થળ પર નાસભાગ
રાજકોટ: ગ્રીન લેન્ડ ચોકડી પાસે આજે સવારે ક્રેઇન ચાલકે આગળ જતા બાઇક સવારનો ભોગ લીધો હતો. એટલું જ નહીં રિક્ષા અને કારને પણ હડફેટે લેતા નાસભાગ મચી ગઇ હતી. બી.ડિવિઝન પોલીસે ક્રેઇન ચાલક સંદીપ ચૌહાણ (ઉ.વ.૨૨, રહે. ખોડીયારપરા, ચુનારાવાડ ચોક, મૂળ. ઉતરપ્રદેશ) ને સકંજામાં લઇ તપાસ આગળ ધપાવી છે.
પ્રાપ્ત માહિતી મુજબ રસિકભાઇ હીરપરા (ઉ.વ.૪૬) મોરબી રોડ નજીક સરદાર પાર્ક શેરી નં.૨માં રહેતા હતા. જુના માર્કેટ યાર્ડની બાજુમાં ગ્રીસની કેબીન ધરાવતા હતા. આજે સવારે નિત્યક્રમ મુજબ બાઇક લઇને કેબીને જવા રવાના થયા હતા. ત્યાર પછી પેડક રોડથી ગ્રીન લેન્ડ ચોકડી તરફ જતા હતા ત્યારે ગ્રીન લેન્ડ ચોકડી પાસે જ પાછળથી પૂરપાટ વેગે ધસી આવેલી ક્રેઇને હડફેટે લેતા ગંભીર ઇજા સાથે સિવિલમાં ખસેડાયા હતા. જ્યાં મૃત્યુ નીપજ્યું હતું.
અકસ્માત સર્જનાર ક્રેઇને નજીકમાં પાર્ક રિક્ષા અને સ્વીફ્ટ કારને પણ હડફેટે લેતા તેમાં નુક્શાની થઇ હતી. આ બનાવને પગલે રસિકભાઇના પરિવારમાં શોક વ્યાપી ગયો હતો. બી.ડિવિઝન પોલીસે તેના પત્ની શિલ્પાબેનની ફરિયાદ પરથી ક્રેઇન ચાલક સામે ગુનો નોંધ્યો હતો. મૃતકને સંતાનમાં ૨૧ વર્ષનો પુત્ર છે.
અકસ્માત સર્જાયા બાદ સ્થળ પર લોકોના ટોળાં ઉમટી પડયા હતા. ક્રેઇન ચાલક સ્થળ પરથી જ મળી આવતા તેની પોલીસે અટકાયત કરી હતી.
