Vadodara : પ્રતાપનગર રેલવે સ્ટેશન પર ટ્રાફિક સંચાલન વધુ સુગમ અને સુરક્ષિત બનાવવા માટે હાથ ધરાયેલ ટ્રેક સુધારણા કાર્ય પૂર્ણ કરાયું છે. વર્ષ 2022-23 દરમિયાન રૂ.10.69 કરોડના ખર્ચે મંજૂર થયેલ આ પ્રોજેક્ટ હેઠળ લાઇન નંબર-6ને ડાઉન મેઇન લાઇન સાથે સીધી કનેક્ટિવિટી આપવામાં આવી છે, જેનાથી યાર્ડ ઓપરેશન વધુ અસરકારક બનશે. કામના ભાગરૂપે પોઈન્ટ નંબર 119/120 દૂર કરવામાં આવ્યા છે, જ્યારે પોઈન્ટ નંબર 121/122ને સ્થળાંતર કરાયા છે. ઉપરાંત, પ્લેટફોર્મ નંબર 4 અને 5ને વિસ્તૃત કરીને લાંબી ટ્રેનોને અનુકૂળ બનાવવામાં આવ્યા છે.
ટેકનિકલ સુધારણા હેઠળ સિંગલ સ્લિપ ડાયમંડ નંબર 104/105ને દૂર કરીને સરળ 1:12 ટર્નઆઉટ લગાવવામાં આવ્યો છે, જેનાથી ટ્રેકની જટિલતા ઘટી છે અને સુરક્ષામાં વધારો થયો છે. આ વિકાસકાર્યના પરિણામે પ્લેટફોર્મ નંબર 6 અને 7 પર આવતી ડાઉન ટ્રેનોના રિસેપ્શન દરમિયાન થતો વિલંબ ઘટશે. સાથે જ પ્લેટફોર્મ નંબર 4 અને 5 હવે 22 એલએચબી કોચ સુધીની ટ્રેનો સંભાળી શકશે. આ સુધારણાથી મુસાફર ટ્રેનોની સમયપાબંદીમાં સુધારો થશે તેમજ યાર્ડની કાર્યક્ષમતા અને ઓપરેશનલ મોબિલિટી વધશે.
