Surat : સુરતના રાજ માર્ગ પર પાણીની ભીત વિસ્તારમાં સીટી બસના બસ સ્ટેન્ડ બાજુમાં નો પાર્કિંગનું બોર્ડ છે. આ બોર્ડની બાજુમાં જ સ્માર્ટ પાર્કિંગના નામે પે એન્ડ પાર્ક નું બોર્ડ લગાવવામાં આવ્યું છે. એક તરફ વાહન પાર્ક ન કરવા અને બીજી તરફ વાહન પાર્ક કરો તેવા બે વિરોધાભાષી બોર્ડ એક જગ્યાએ લાગ્યા છે તે લોકોમાં કુતુહુલનું કારણ બન્યા છે. નો પાર્કિંગ બોર્ડ નીચે જ પે એન્ડ પાર્કનું બોર્ડ તંત્રની ભુલના કારણે લાગ્યું કે છે લોકોને લુંટવા માટે તે ચર્ચાનો વિષય બન્યો છે. જો તંત્ર તપાસ કરે તો મોટું કૌભાંડ બહાર આવે તેવી શક્યતા નકારી શકાતી નથી.
સુરત પાલિકાએ આવકના સ્ત્રોત માટે શહેરના અનેક જગ્યાએ પે એન્ડ પાર્કના કોન્ટ્રાક્ટ આપ્યા છે પરંતુ કેટલીક જગ્યાએ કોન્ટ્રાક્ટ પૂરો થયા બાદ પે એન્ડ પાર્કના નામે ઉઘરાણા કરી રહ્યાં છે તો કેટલીક જગ્યાએ કેટલાક તત્વોએ આડેધડ પે એન્ડ પાર્કના બોર્ડ ખોટી રીતે લગાવી લોકોને લૂંટી રહ્યા હોવાની ફરિયાદ ઉઠી છે. આવા પ્રકારની ફરિયાદ વચ્ચે સુરતના રાજ માર્ગ પર પાણીની ભીત વિસ્તારમાં બસ સ્ટેન્ડ બહાર નો પાર્કિંગનું બોર્ડ લાગવા સાથે અહીં વાહનો પાર્ક કરવા નહીં તેવું બોર્ડ પણ લાગ્યું છે. પાલિકા-પોલીસ દ્વારા આવા પ્રકારના બોર્ડ લાગ્યા છે તેમ છતાં આ બોર્ડ નીચે જ સ્ટોપ લુકીંગ સ્માર્ટ પાર્કિંગ અને પેન્ડ પાર્કના બોર્ડ લાગ્યા છે જે વિવાદનું કારણ બન્યા છે.
લોકો તંત્ર પર પ્રશ્ન ઉઠાવી રહ્યાં છે કે પાલિકા અને પોલીસે નો પાર્કિંગ બોર્ડ લગાવ્યા છે તે સાચા છે કે સ્માર્ટ પાર્કિંગના નામે પે એન્ડ પાર્કના બોર્ડ લાગ્યા છે ? લોકોને શંકા છે કે આ પે એન્ડ પાર્કના બોર્ડ લોકોને લૂંટવા માટે લગાવવામાં આવ્યા છે. બસ સ્ટેન્ડ બહાર જ લાગેલા પે એન્ડ પાર્કના બોર્ડ લોકો શંકાની નજરે જોઈ રહ્યા છે તેથી ક્યા બોર્ડ સાચા છે તેની તપાસ કરવા માટે માંગણી કરી રહ્યાં છે જો તપાસ યોગ્ય રીતે થાય તો લોકોને લુંટવાનું મોટું કૌભાંડ બહાર આવી શકે તેમ છે.
