Ahmedabad News: ગુજરાત યુનિવર્સિટીના વિદ્યાર્થીઓ માટે મહત્વના સમાચાર સામે આવ્યા છે. આગામી સ્થાનિક સ્વરાજ્યની ચૂંટણીઓને ધ્યાનમાં રાખીને યુનિવર્સિટી વહીવટી તંત્ર દ્વારા UG અને PGના વિવિધ સેમેસ્ટરની પરીક્ષાઓના કાર્યક્રમમાં મોટો ફેરફાર કરવામાં આવ્યો છે. અંદાજે 1.50 લાખ જેટલા વિદ્યાર્થીઓ પર આ નિર્ણયની સીધી અસર પડશે.
ત્રણ ફેઝના કાર્યક્રમમાં ફેરફાર
યુનિવર્સિટીની પરીક્ષા સમિતિ દ્વારા અગાઉ પાંચ ફેઝમાં પરીક્ષાઓનું આયોજન કરવામાં આવ્યું હતું. જે પૈકી બે ફેઝની પરીક્ષાઓ સમયસર પૂર્ણ થઈ ગઈ છે. જોકે, બાકીના ત્રણ ફેઝ જેમાં UG (સ્નાતક) અને PG (અનુસ્નાતક) ના મહત્વના સેમેસ્ટર્સનો સમાવેશ થાય છે, તેના કાર્યક્રમમાં ફેરફાર કરવામાં આવ્યો છે.
નવા જાહેર થયેલા કાર્યક્રમ મુજબ
પ્રથમ ફેરફાર: 16 એપ્રિલથી શરૂ થતી પરીક્ષાઓ હવે 1 મે થી શરૂ થશે.
દ્વિતીય ફેરફાર: 24 એપ્રિલની પરીક્ષાઓ હવે 12 મે થી લેવામાં આવશે.
તૃતીય ફેરફાર: 5 મે ના રોજ યોજાનારી પરીક્ષાઓ હવે 21 મે થી શરૂ થશે.
આ પણ વાંચો: કોંગ્રેસના દિગ્ગજ નેતા મોહસિના કિદવઈનું નિધન, પૂર્વ PM ઈન્દિરા-રાજીવ સાથે હતા ખાસ સંબંધ
કયા કોર્સના વિદ્યાર્થીઓને અસર થશે?
આ ફેરફારને કારણે આર્ટસ, કોમર્સ, સાયન્સ, લો અને એજ્યુકેશન જેવી તમામ વિદ્યાશાખાઓના વિદ્યાર્થીઓ પ્રભાવિત થશે. ખાસ કરીને NEP (નવી શિક્ષણ નીતિ) હેઠળના કોર્સ અને ઇન્ટિગ્રેટેડ કોર્સના વિદ્યાર્થીઓએ હવે મે મહિનાની કાળઝાળ ગરમીમાં પરીક્ષા આપવા તૈયાર રહેવું પડશે. બી.એ., બી.કોમ., બી.એસસી. સેમેસ્ટર 2, 4 અને 6 ના વિદ્યાર્થીઓ તેમજ એમ.એ. અને એમ.કોમ.ના વિદ્યાર્થીઓ માટે હવે વાંચવા માટે વધારાનો સમય મળ્યો છે, પરંતુ બીજી તરફ પરિણામો મોડા આવવાની શક્યતા પણ વધી છે.
વહીવટી તંત્રની તૈયારી
યુનિવર્સિટીના પરીક્ષા વિભાગે આ રિવાઈઝડ કાર્યક્રમ તમામ સંલગ્ન કોલેજો અને વિભાગોમાં મોકલી આપ્યો છે. ચૂંટણીની કામગીરીમાં સ્ટાફ અને બિલ્ડિંગના રોકાણને કારણે આ નિર્ણય લેવો અનિવાર્ય બન્યો હતો. પરીક્ષા વિભાગના અધિકારીઓના જણાવ્યા મુજબ, મે મહિનામાં પરીક્ષાઓ લેવા માટે સેન્ટરોની વ્યવસ્થા અને પાણી-વીજળી જેવી સુવિધાઓ પર ખાસ ધ્યાન આપવામાં આવશે જેથી વિદ્યાર્થીઓને મુશ્કેલી ન પડે.
કેમ લેવાયો નિર્ણય?
યુનિવર્સિટી દ્વારા કુલ પાંચ ફેઝમાં પરીક્ષાઓનું આયોજન કરવામાં આવ્યું હતું. જેમાંથી બે ફેઝની પરીક્ષા પૂર્ણ થઈ ચૂકી છે. પરંતુ ચૂંટણી પ્રક્રિયાને કારણે બાકીના ત્રણ ફેઝની પરીક્ષાઓ હવે એપ્રિલને બદલે મે મહિનામાં યોજાશે.
1 મે થી શરૂ થતી પરીક્ષાઓ:B.A., B.Com, B.Sc, B.B.A, B.C.A, B.R.S (સેમેસ્ટર-4 અને 6)M.A. (સેમેસ્ટર-3)ઇન્ટિગ્રેટેડ કોર્સ (સેમેસ્ટર-2, 4, 6, 8, 10)LL.B. (સેમેસ્ટર-2) અને B.Ed. (સેમેસ્ટર-2)
2. 12 મે થી શરૂ થતી પરીક્ષાઓ:M.A., M.Com, M.Sc, M.R.S, M.M.C.J, M.Ed (સેમેસ્ટર-2)B.A., B.Com, B.Sc, B.B.A, B.C.A (સેમેસ્ટર-2)NEP (ન્યૂ એજ્યુકેશન પોલિસી) હેઠળના UG કોર્સ (સેમેસ્ટર-4)
3. 21 મે થી શરૂ થતી પરીક્ષાઓ: NEP હેઠળના UG-PG અને ડિપ્લોમા કોર્સના વિવિધ સેમેસ્ટરની પરીક્ષાઓ.
