Umreth by Election 2026: આગામી 23મી એપ્રિલના રોજ યોજાનાર ઉમરેઠ વિધાનસભાની પેટા ચૂંટણી પૂર્વે જ રાજકીય ગરમાવો તેજ બન્યો છે. ભાજપના ઉમેદવાર હર્ષદ પરમારે પોતાના ચૂંટણી સોગંદનામામાં સ્થાવર મિલકતોની વિગતો છુપાવી હોવાના ગંભીર આક્ષેપ સાથે સ્થાનિક નાગરિકે ઉમરેઠ પોલીસ મથકે લેખિત રજૂઆત કરી ફરિયાદ નોંધાવવાની માંગ કરતા ખળભળાટ મચી ગયો છે. ચૂંટણી અધિકારી દ્વારા કોઈ કાર્યવાહી ન કરાતા હવે આ મામલો કાયદાકીય લડત તરફ વળ્યો છે.
ઉમેદવારી ફોર્મ રદ કરવાની માંગ
ચોથીથી એપ્રિલના રોજ મુખ્યમંત્રીની હાજરીમાં ભાજપ ઉમેદવાર હર્ષદભાઈ પરમારે પોતાનું નામાંકન પત્ર ભર્યું હતું. આ ફોર્મની ચકાસણી દરમિયાન ચિખોદરાના નાગરિક વિજયકુમાર મકવાણાએ પુરાવા સાથે વાંધો ઉઠાવ્યો હતો કે ઉમેદવારે સોગંદનામાના ફોર્મ નં. 26માં પોતાની તમામ મિલકતો દર્શાવી નથી. આક્ષેપ મુજબ, હર્ષદ પરમારે માત્ર બેડવા ગામની બે મિલકતો દર્શાવી છે, જ્યારે ચિખોદરા અને અડાસ ગામમાં આવેલી તેમની અન્ય મિલકતોની વિગતો છુપાવી છે.
આ પણ વાંચો: સ્થાનિક સ્વરાજ્ય ચૂંટણીની અવનવી ઘટનાઓ, ક્યાંક સામૂહિક રાજીનામા તો ક્યાંક નેતાઓ રડ્યાં
વિજયકુમાર મકવાણાએ ચૂંટણી અધિકારી અને જિલ્લા ચૂંટણી અધિકારી સમક્ષ લેખિતમાં રજૂઆત કરી ઉમેદવારી ફોર્મ રદ કરવાની માંગ કરી હતી. જોકે, તંત્ર દ્વારા આ બાબતે કોઈ નક્કર પગલાં ન લેવાતા આખરે તેમણે ઉમરેઠ પોલીસ મથકે દોડી જઈ આરપી એક્ટ 125 અને બીએનએસની વિવિધ કલમો હેઠળ ગુનો નોંધવા અરજી આપી છે.
મિલકત છુપાવવી એ ગંભીર ગુનો
ફરિયાદમાં જણાવ્યું છે કે, સુપ્રીમ કોર્ટના નિર્દેશો મુજબ મિલકત છુપાવવી એ ગંભીર ગુનો છે. આ વિવાદને પગલે ઉમરેઠના સ્થાનિક રાજકારણમાં અનેક તર્ક-વિતર્કો શરૂ થયા છે. અરજદાર વિજયકુમાર મકવાણાએ જણાવ્યું છે કે, જો ચૂંટણી તંત્ર અને પોલીસ દ્વારા આ બાબતે આંખ આડા કાન કરવામાં આવશે, તો તેઓ આગામી દિવસોમાં હાઈકોર્ટમાં રિટ પિટિશન દાખલ કરશે. ચૂંટણી ટાણે જ ભાજપ ઉમેદવાર સામે થયેલી આ ફરિયાદ પક્ષ માટે મુશ્કેલી ઉભી કરી શકે છે.
