Double Decker Bus Trial In Surat: સુરત પાલિકાની ચૂંટણીના કારણે વહીવટી તંત્ર અને સરકારનો મીજાજ તદ્દન બદલાયેલો જોવા મળી રહ્યો છે. છેલ્લા લાંબા વર્ષોથી ફાઈલમાં દબાયેલા ડુમસ સી ફેઝ ડેવલપમેન્ટ, ખાડી સફાઇ, સબરસ ગરનાળું જેવા પ્રોજેક્ટ શરુ થઈ ગયા છે. પાલિકાની ચૂંટણી પહેલાં 8 કિલોમીટર જેટલાં રુટ પર મેટ્રો ટ્રાયલ રન શરુ થઈ ગઈ હતી. તો હવે ચૂંટણી પ્રચારના જામેલા માહોલમાં શહેરના બે રુટ પર જીએસઆરટીસી પાસે લવાયેલી ડબલ ડેકર બસનો ટ્રાયલ રન શરુ થયો છે. ચૂંટણીના માહોલ વચ્ચે શરુ થેયલા આ રૂટના કારણે રાજકીય માહોલ પણ ગરમાયો છે.
સુરત પાલિકાની ટર્મ પૂરી થાય તેની છેલ્લી સ્થાયી સમિતિ- સામાન્ય સભામાં એ.સી. ડબલ ડેકર બસ ખરીદવા તથા ડ્રાઈવર સહિત 10 વર્ષના કોમ્પ્રીહેન્સીવ એન્યુઅલ મેઈન્ટેનન્સ કોન્ટ્રાકટની દરખાસ્ત મંજૂર થઈ હતી. બસની ખરીદી માટે મ્યુનિ. કમિશનરને આગામી કાર્યવાહી માટે અધિકૃત કરવામાં હતા. જોકે, સુરત પાલિકા ગુજરાત સ્ટેટ રોડ ટ્રાન્સપોર્ટ કોર્પોરેશન દ્વારા બસ ખરીદ કરવા ટેન્ડર મંગાવી સ્વીચ મોબીલીટી ઓટોમેટીવ લિમિટેડ, ચેન્નાઈને વર્ક ઓર્ડર આપવામાં આવ્યો છે. જો કે, આ બસ ડિસેમ્બર મહિનામાં આવે તેવી શક્યતા છે.
ડબલ ડેકર બસની ટ્રાયલ
આ પહેલા શહેરના 45 અને 60 મીટરના રસ્તા પર ડબલ ડેકર બસ દોડાવવા માટે પાલિકાએ જીએસઆરટીસી પાસે ડબલ ડેકર બસ માગી હતી, આમ તે બસ અલથાણ ડેપો પર આવી ગઈ છે. આ બસનો ટ્રાયલ રુટ દિલ્હીગેટ બસ ડેપોથી કામરેજ અને દિલ્હી ગેટ બસ ડેપોથી કસોડ સુધીનો રહેશે, આ રુટ પર ટ્રાયલ શરુ કરવામાં આવ્યા છે. હાલ શહેરના રુટ પર ડબલ ડેકર બસ દોડે તે માટે ફીજીબીલીટીના ભાગરુપે બસ શરુ કરવામાં આવી છે. જેમાં બસની ઉંચાઈ, પહોળા રસ્તા તથા ડબલ ડેકર બસ માટેના ટર્નિંગ અનુકુળ છે કે નહીં તેની ચકાસણી કરવામાં આવશે.
આ પણ વાંચો: અમદાવાદ: ભાજપ ઉમેદવારને અધૂરા કામ બતાવ્યા તો ‘જય શ્રી રામ’ બોલી ચાલતી પકડી, સ્થાનિકોએ લગાવ્યા ‘ભાગ્યા..ભાગ્યા..’ના નારા
પાલિકાની બસ છ મહિના બાદ આવે તેમ છે તે પહેલાં જીએસઆરટીસી પાસે ડબલ ડેકર બસ મંગાવી ટ્રાયલ રુટ શરુ કર્યો છે. જોકે, હાલ સુરતમાં ચૂંટણીનો માહોલ જામ્યો છે અને તેમાં પાલિકા તંત્ર દ્વારા ડબલ ડેકર બસનો ટ્રાયલ રુટ શરુ કર્યો છે જેનાથી વિવાદ છે. જ્યારે તંત્રનું કહેવું છે કે, બસના ટેન્ડર માટેની પ્રક્રિયા મંજૂર થઈ ગઈ છે. નજીકના દિવસોમાં બસ આવી જશે, તે પહેલાં ફીજીબીલીટીની ચકાસણી જરૂરી છે. જો કે, ચૂંટણી પહેલા આ ટ્રાયલ શરુ કરવામાં આવી હોવાથી કેટલાક તેને લોકોને લોભાવવાનો પ્રયાસ પણ ગણી રહ્યા છે.
