Glue Traps Catch Rats: રાજ્યભરમાં ઉંદર પકડવા માટે વપરાતી જીવલેણ ‘ગ્લુ ટ્રેપ’ પર પ્રતિબંધ મૂકવા અંગેની સુનાવણીમાં ગુજરાત હાઈકોર્ટે સરકારનો ઉધડો લીધો હતો. હાઈકોર્ટેની ખંડપીઠે સરકારની કામગીરી સામે ગંભીર સવાલો ઉઠાવતા કહ્યું કે, સંબંધિત વિભાગોએ ગ્લુ ટ્રેપના ઉત્પાદન અને વેચાણ પર પ્રતિબંધ લગાવવા બાબતે કોઈ સંતોષજનક પગલાં લીધા નથી.
અધૂરા સોગંદનામાનો સ્વીકાર કરવા હાઈકોર્ટનો ઇનકાર
કોર્ટે સરકાર દ્વારા રજૂ કરવામાં આવેલા અપૂરતી માહિતીવાળા સોગંદનામાને સ્વીકારવાનો સ્પષ્ટ ઇનકાર કરી દીધો હતો. ખંડપીઠે આકરી ટકોર કરતા જણાવ્યું કે, “હાઈકોર્ટની કોર્ટમાં બોલ ના નાખશો. તમને એ પણ ખબર નથી હોતી કે પ્રતિબંધિત વસ્તુઓ બજારમાં કેવી રીતે વેચાય છે.” કોર્ટે ગૃહ વિભાગ અને એનિમલ હસબન્ડરી વિભાગને આ મામલે અલ્ટીમેટમ આપ્યું છે.
ચીફ સેક્રેટરી પાસે જવાબ માંગ્યો
હાઈકોર્ટે આ મામલે રાજ્યના ચીફ સેક્રેટરી (મુખ્ય સચિવ) પાસે અત્યાર સુધી શું પગલાં લેવાયા છે તેનો વિગતવાર જવાબ માંગ્યો છે. કોર્ટે અવલોકન કર્યું કે, સરકારી વિભાગો માત્ર સર્ક્યુલર બહાર પાડીને સંતોષ માની લે છે. આ સર્ક્યુલરનું પાલન થાય છે કે નહીં તેનું મોનિટરિંગ કરાતુ નથી. ઓફલાઇન બજારમાં પ્રતિબંધ હોય તો પણ ઓનલાઇન પ્લેટફોર્મ પર ગ્લુ ટ્રેપનું વેચાણ ધમધમી રહ્યું છે.
કલેક્ટર અને એનિમલ હસબન્ડરી વિભાગને આદેશ
ખંડપીઠે રાજ્યના તમામ ડિસ્ટ્રિક્ટ કલેક્ટર અને ડાયરેક્ટર ઓફ એનિમલ હસબન્ડરીને આ મામલે તાત્કાલિક રિપોર્ટ રજૂ કરવા આદેશ કર્યો છે. કોર્ટે કડક શબ્દોમાં ચેતવણી આપી છે કે, “અમને સરકારે બનાવેલી વાર્તાઓ સાંભળવામાં કોઈ રસ નથી. જો કોર્ટ હુકમનું પાલન કરાવવા માટે કડક વલણ અપનાવશે તો સરકારને આકરું પડશે.”
આ પણ વાંચો: સાબરમતી પ્રદૂષણ મુદ્દે હાઈકોર્ટ લાલઘૂમ: ‘કંઈ શક્ય નથી’ જેવા શબ્દો સોગંદનામામાંથી હટાવો, CETPના પાલન અંગે અલ્ટીમેટમ
ઉલ્લેખનીય છે કે ગ્લુ ટ્રેપમાં ફસાયેલા પ્રાણીઓ અત્યંત પીડાદાયક રીતે મૃત્યુ પામતા હોવાથી તેના પર પ્રતિબંધની માંગ કરવામાં આવી છે, પરંતુ તેના અમલીકરણમાં તંત્રની નિષ્ફળતા સામે હવે હાઈકોર્ટે લાલ આંખ કરી છે.
