બેઠકની સામાન્ય ચૂંટણી, ૧૦,૭૪૨ મતદાન સ્ટાફને જવાબદારી ૩૭૬
મનપા, પંચાયત અને પાલિકાની શાસન ધૂરા સોંપવા ઈવીએમમાં જનાદેશ કેદ થશે ઃ ઉનાળાની કાળઝાળ ગરમી મતદારોની પરીક્ષા લેશે ઃ પાણી-મેડિકલ કીટની સાથે દિવ્યાંગ મતદારો માટે વ્હીલચેરની વ્યવસ્થા
ભાવનગર – ભાવનગર જિલ્લામાં સ્થાનિક સ્વરાજ્યની સંસ્થાઓની શાસક ધૂરા સોંપવા માટે આવતીકાલે ૨૬મી એપ્રિલે લોકશાહીનું મહાપર્વ ઉજવાશે. જિલ્લાના ૧૭.૩૧ લાખથી વધુ મતદારો ૧૧૧૮ ઉમેદવારના ભાવિનો જનાદેશ ઈવીએમમાં કેદ કરશે. મનપા, પંચાયત અને પાલિકાની ચૂંટણીને લઈ તંત્ર દ્વારા તમામ તૈયારીઓ પૂર્ણ કરી દેવામાં આવી છે. સમગ્ર મતદાન પ્રક્રિયા નિષ્પક્ષ, નિર્વિવાદિત રીતે સંપન્ન થાય તે માટે ૧૦,૭૪૨ મતદાન સ્ટાફને જવાબદારી સોંપવામાં આવી છે.
ભાવનગર મહાપાલિકાની ૫૨, જિ.પં.ની ૪૦, ૧૦ તા.પં.ની ૨૦૬ અને ૩ ન.પા.ની ૭૮ બેઠક માટે કાલે રવિવારે મતદાન થશે. ૧૮ બેઠક બિનહરીફ થતાં કાલે ૩૭૬ સીટ માટે ચૂંટણી યોજાનારી હોય, મતદાતાઓને રિઝવવા માટે ઉમેદવારો અને રાજકીય પક્ષો, કાર્યકરોએ છેલ્લી ઘડીની તનતોડ મહેનત કરી હતી. આ વખતે ચૂંટણીનો ખાસ ઉત્સાહ જોવા મળી રહ્યો નથી. અધૂરામાં પૂરું મતદાનના એક દિવસ પહેલા આજે રેકોર્ડબ્રેક ગરમી પડતા ચૂંટણી તંત્ર અને ઉમેદવારોનું ટેન્શન વધ્યું હતું. કાલે પણ ઉનાળાની કાળઝાળ ગરમી રહેવાના એંધાણ હોવાથી મતદારોની પરીક્ષા થશે.
ચૂંટણી અધિકારી અને જિલ્લા કલેક્ટરે વિગતો આપતા જણાવ્યું હતું કે, ચૂંટણી પ્રક્રિયામાં ૪૪૦૦ બી.યુ. અને ૩૭૩૫ સી.યુ.નો ઉપયોગ થશે. કાયદો-વ્યવસ્થા જાળવવા આશરે ૩૮૦૦થી વધુ પોલીસ સ્ટાફ ફરજ બજાવશે. ઉનાળાની ઋતુને ધ્યાનમાં રાખી મતદારો માટે મતદાન મથકોના સ્થળે મંડપ નાંખવામાં આવ્યા છે. પીવાના પાણીની પૂરતી વ્યવસ્થા ઉભી કરાશે. સાથો સાથ મેડિકલ કીટ, આરોગ્ય ટીમોને સ્ટેન્ડ બાય રાખવામાં આવી છે. દિવ્યાંગ મતદારો માટે વ્હીલચેરની વ્યવસ્થા કરાઈ છે. જિલ્લામાં ૯,૦૦,૪૪૭ પુરૃષ, ૮,૩૦,૮૧૨ સ્ત્રી મળી ૧૭,૩૧,૨૫૯ મતદારો નોંધાયેલા છે. મતદારોને વધુમાં વધુ મતદાન કરવા અને આકરા તાપથી બચવા સવાર અને સાંજના સમયે મતદાન કરવા તેમણે અનુરોધ કર્યો હતો.
