અમદાવાદ, સંજીવ રાજપૂત, એબીએનએસ: અમદાવાદ શહેરમાં ટ્રાફિક સમસ્યાના નિવારણ અને રાહદારીઓની સુવિધા માટે એક મહત્વપૂર્ણ પગલું ભરવામાં આવ્યું છે. H ટ્રાફિક પોલીસ સ્ટેશન, બાપુનગર પોલીસ સ્ટેશન અને અમદાવાદ મ્યુનિસિપલ કોર્પોરેશન (AMC) ના દબાણ વિભાગ દ્વારા સંયુક્ત રીતે સઘન દબાણ હટાવ કામગીરી હાથ ધરવામાં આવી હતી.
આવરી લેવાયેલા વિસ્તારો; બાપુનગર ચાર રસ્તાથી ભીડ ભંજન મંદિર: કાપડ બજાર વિસ્તારના તમામ ગેરકાયદેસર દબાણો દૂર કરવામાં આવ્યા. બાપુનગર ચાર રસ્તાથી સ્ટેડિયમ માર્ગ: રસ્તા પર નડતરરૂપ શાકભાજીની લારીઓ અને અન્ય અનધિકૃત દબાણો હટાવી રસ્તો ખુલ્લો કરવામાં આવ્યો.
આ વિસ્તારમાં સતત ટ્રાફિક જામની સમસ્યા રહેતી હતી, જેના કારણે સ્થાનિક રહેવાસીઓ અને વાહનચાલકોને ભારે હાલાકીનો સામનો કરવો પડતો હતો. આ સંયુક્ત ટીમના પ્રયાસોથી ટ્રાફિકની સમસ્યામાં નોંધપાત્ર ઘટાડો થવાની આશા છે. AMC અને પોલીસ વિભાગની આ સરાહનીય કામગીરીને સ્થાનિક નાગરિકો અને વેપારીઓ તરફથી ખૂબ સારો પ્રતિસાદ મળ્યો છે.
સત્તાવાળાઓ દ્વારા સ્પષ્ટતા કરવામાં આવી છે કે રસ્તા પર થતા આવા અનધિકૃત દબાણો સામે ભવિષ્યમાં પણ કડક કાર્યવાહી ચાલુ રહેશે. આ ઝુંબેશનો મુખ્ય ઉદ્દેશ્ય શહેરીજનોને સુરક્ષિત અને અવરજવર માટે સરળ રસ્તાઓ પ્રદાન કરવાનો છે.
