– કરમસદ-આણંદ મનપા વિસ્તારમાં એસ્ટેટ અને ટાઉન પ્લાનિંગ વિભાગ દ્વારા ખાસ ઝુંબેશ
– હાઈકોર્ટની મુદત પૂર્ણ થતા જે.કે. લોટસમાં બુલડોઝર ફર્યુંત રહેણાંક ફ્લેટમાં પરવાનગી વગર ચાલતા ક્લાસીસ સામે પણ કડક કાર્યવાહી : મ્યુનિસિપલ કમિશનરના સીધા માર્ગદર્શન હેઠળ એસ્ટેટ અને ટાઉન પ્લાનિંગ વિભાગની સપાટો
આણંદ : કરમસદ-આણંદ મનપા વિસ્તારમાં એસ્ટેટ અને ટાઉન પ્લાનિંગ વિભાગ દ્વારા ખાસ ઝુંબેશ હાથ ધરવામાં આવી હતી. આ અંતર્ગત શહેરના જાણીતા જે.કે. લોટસ પાર્ટી પ્લોટનું અનઅધિકૃત બાંધકામ દૂર કરવામાં આવ્યું હતું, જ્યારે આણંદ-વિદ્યાનગર રોડ ઉપર હોટલ એચની સામે આવેલા આવિષ્કાર કોમ્પલેક્સમાં રેસિડેન્સિયલ વિસ્તારમાં ચાલતા પ્રતિભા એકેડેમી ક્લાસિસને સીલ કરી દેવામાં આવ્યા છે.
આણંદ શહેરમાં આવેલા જે. કે. લોટસ પાર્ટી પ્લોટને અગાઉ બિલ્ડીંગ યુઝ અને ફાયરની જરૂરી પરમિશન નહીં હોવાથી મહાનગરપાલિકા દ્વારા નોટિસ આપવામાં આવી હતી.
આ નોટિસ અન્વયે જે. કે. લોટસના માલિકો ગુજરાત હાઇકોર્ટમાં ગયા હતા. ગુજરાત હાઇકોર્ટ દ્વારા જરૂરી પરમિશન તારીખ ૧ માર્ચ ૨૦૨૬ સુધીમાં મેળવી લેવા જણાવ્યું હતું. જે અંતર્ગત મહાનગરપાલિકા દ્વારા અગાઉ જે.કે. લોટસ પાર્ટી પ્લોટ સીલ કરવામાં આવ્યો હતો તે ખોલવામાં આવ્યો હતો. તારીખ ૧ માર્ચ ૨૦૨૬ના રોજ ગુજરાત હાઇકોર્ટ દ્વારા આપવામાં આવેલો સ્ટે હટાવતા મહાનગરપાલિકા દ્વારા કાયદાની જોગવાઈને આધીન કલમ ૨૬૦ હેઠળ જે.કે પાર્ટી પ્લોટ્સ દ્વારા બિન પરવાનગીથી કરાયેલું બાંધકામ દૂર કરવા અંગે નોટિસ આપવામાં આવી હતી અને જરૂરી પરવાનગીઓ રજૂ કરવા જણાવ્યું હતું.
જે. કે. લોટસ પાર્ટી પ્લોટ્સના માલિક દ્વારા હાઇકોર્ટ દ્વારા આપવામાં આવેલી મુદત પૂર્ણ થતા કોઈપણ પ્રકારની બી યુ, ફાયર કે કોઈ પરવાનગી ન મેળવતા જે.કે. લોટસ પાર્ટી પ્લોટ ખાતે બિન પરવાનગીથી કરેલું બાંધકામ દૂર કરવા માટે નોટિસ આપ્યા બાદ સંચાલકો દ્વારા કોઈપણ પ્રકારના પુરાવા રજૂ ન કરતા અને કોઈપણ પ્રત્યુતર ન પાઠવતા બીન પરવાનગીથી કરવામાં આવેલ બાંધકામ દૂર કરવા અંગે આખરી નોટિસ પણ આપવામાં આવી હતી. પરંતુ સંચાલકો દ્વારા કોઈપણ પ્રત્યુતર મહાનગરપાલિકાને ન મળતા મનપાની એસ્ટેટ વિભાગની ટીમ દ્વારા અનઅધિકૃત બાંધકામ દૂર કરવામાં આવ્યું હતું.
જ્યારે કરમસદ-આણંદ મહાનગરપાલિકાના એસ્ટેટ વિભાગ અને ટાઉન પ્લાનિંગ વિભાગના અધિકારીઓ દ્વારા આણંદ-વિદ્યાનગર રોડ ઉપર હોટલ એચની સામે આવેલા આવિષ્કાર કોમ્પલેક્સમાં રેસિડેન્સિયલ વિસ્તારમાં ચાલતા પ્રતિભા એકેડેમી ક્લાસિસ ખાતે આકસ્મિક તપાસણી હાથ ધરવામાં આવી હતી. જે તપાસણી દરમિયાન આ ક્લાસિસ પાસે કોઈપણ પ્રકારની મહાનગરપાલિકાની મંજૂરી વગર ચલાવવામાં આવતા હોવાનું જણાતા તેમજ ફ્લેટમાં બિન પરવાનગીથી વાણિજ્ય હેતુની પ્રવૃત્તિઓ ચાલતી હોવાથી તાત્કાલિક અસરથી આ ક્લાસિસને સીલ કરવામાં આવ્યા છે.
