Surat : સુરત મહાનગરપાલિકા તંત્ર શહેર વિકાસનાં દાવા અને મીટિંગના દેખાડામાં વ્યસ્ત છે, જ્યારે જમીન પર હકીકત સંપૂર્ણ વિપરીત દેખાઈ રહી છે. શહેરના મુખ્ય માર્ગો પર મોટા બિલ્ડર અને પ્રોજેક્ટ ધારકો જાહેર રોડને પોતાની જાગીર સમજી જોખમી રીતે સળીયા, લોખંડ, રેતી અને બાંધકામ મટીરીયલ્સના ઢગલા મૂકી રહ્યા છે. સામાન્ય નાગરિક નાનું સામાન રોડ પર મૂકે તો તાત્કાલિક દંડ ફટકારતા તંત્ર હવે મોટા માથાઓ સામે મૌન બની ગયું હોવાના આક્ષેપ થઈ રહ્યો છે. રોજ હજારો વાહન પસાર થતાં રસ્તાઓ પર અકસ્માતને આમંત્રણ આપતી આ સ્થિતિ છતાં અધિકારીઓ મીટિંગમાં વ્યસ્ત હોવાથી લોકોના જીવને જોખમ ઊભું થયું છે.
સુરત પાલિકા તંત્ર પાલિકા કચેરી બાજુએ મૂકીને આઈસીસીસીના એસી હોલમાં સતત મીટીંગ, પ્રેઝન્ટેશન અને સમીક્ષા બેઠકોમાં વ્યસ્ત હોવાનું દર્શાવી રહ્યું છે, પરંતુ શહેરની હકીકત રસ્તા પર બિલકુલ જુદી નજરે પડી રહી છે. શહેરના અનેક રોડ મુખ્ય માર્ગ જ્યાં હજારો વાહન પસાર થાય છે તેવા રોડ બિલ્ડરોનો કબજો થઈ રહ્યો છે. આ રોડ પર બાંધકામ થઈ રહ્યાં છે તે રોડ પાલિકા નહીં બિલ્ડરની માલિકીના હોય તેવી રીતે સળીયા સહિતના બિલ્ડીંગ મટીરીયલ્સ જોખમી રીતે મુકવામાં આવ્યા છે.
પાલિકા તંત્ર સતત મીટીંગોમાં વ્યસ્ત હોવાથી જાહેર રોડ પર જ જોખમી રીતે સળીયાનું કટીંગ થઈ રહ્યું છે. આ કટીંગ થઈ રહ્યું છે તેની બાજુમાંથી જ હજારો વાહનો સળસળાટ પસાર થઈ રહ્યા છે. આવામાં જો અકસ્માત થાય કે વાહન સ્લીપ થાય તો રોડ પર મુકેલા સળીયા અને સળીયા કટીંગના સાધનો કોઈનો પણ જીવ લઈ શકે છે તેવી સ્થિતિ છે. લોકોમાં સૌથી મોટો સવાલએ છે કે પાલિકાના નિયમો માત્ર સામાન્ય નાગરિકો માટે જ છે? કોઈ નાના વેપારી દુકાન આગળ બે થેલો સિમેન્ટ મૂકે, લારીવાળો થોડું સામાન મૂકે કે સામાન્ય વ્યક્તિ રોડ કિનારે માલ ઉતારે તો તાત્કાલિક દંડ, જપ્તી અને આકરા પગલાં ભરવામાં આવે છે.
પરંતુ કરોડોના પ્રોજેક્ટ ધરાવતા બિલ્ડરો જાહેર રસ્તા પર કબજો જમાવે, જોખમી રીતે સામાન મૂકે, ટ્રાફિક રોકે તો પાલિકા તંત્ર કોઈ કામગીરી નથી કરતું જેથી પાલિકાની બેવડી નીતિ હોવાનું કહેવાઈ રહ્યું છે. શહેરના અનેક વિસ્તારમાં રોડ કિનારે બાંધકામ મટીરીયલ્સના કારણે ટ્રાફિક ધીમો પડી રહ્યો છે. વરસાદી મોસમ નજીક છે ત્યારે રેતી-માટી રોડ પર ફેલાઈ વધુ જોખમ ઊભું થશે તેવી ચિંતા પણ વ્યક્ત થઈ રહી છે. લોકોમાં ચર્ચા છે કે પાલિકાના અધિકારીઓ એરકન્ડિશન્ડ હોલમાં મીટિંગો કરતા રહે છે અને મેદાનમાં જાહેર સુરક્ષા ભગવાન ભરોસે મુકાઈ ગઈ છે. તો બીજી તરફ મોટા પ્રોજેક્ટ વાળાએ અકસ્માત થાય તેવી રીતે રોડ પર અકસ્માત થાય તેવી રીતે મટીરીયલ્સ મુકી પાલિકાને પડકાર ફેંકી રહ્યા હોય તેવો માહોલ થઈ રહ્યો છે.
