Surat City Bus : સુરત પાલિકા સહિત સ્થાનિક સ્વરાજ્યની ચૂંટણી પરિણામ બાદ સરકારના આદેશથી હેરમાં ટ્રાફિક પોલીસ હાલ હેલ્મેટ અને ટ્રાફિક નિયમોના પાલન માટે કડક ડ્રાઈવ ચલાવી રહી છે. રોજિંદા હજારો વાહનચાલકોને રોકી દંડ ફટકારવામાં આવી રહ્યો છે, પરંતુ બીજી તરફ ખુદ સરકારી તંત્રની પાલિકાની સિટી બસો ટ્રાફિકના નિયમોને ખુલ્લેઆમ ધજાગરા ઉડાવતી નજરે પડી રહી છે. પાલનપોર વિસ્તારમાં આજે વહેલી સવારે પાલિકાની સિટી બસ રોંગ સાઈડ દોડતા કાયદાનું પાલન કરતા વાહનચાલકોના જીવ જોખમમાં મુકાઈ ગયા હતા.
સુરત પોલીસ રોડના ખુણે ખુણે ઉભા રહીને હેલ્મેટ વિનાના અને ટ્રાફિકના નિયમોનું પાલન ન કરતા લોકોને દંડ ફટકારી રહી છે તેની સાથે સીસીટીવી કેમેરાનો ઉપયોગ પણ દંડ માટે થઈ રહ્યો છે. પરંતુ પોલીસ અને પોલીસના કેમેરાને માત્ર ટ્રાફિક નિયમોના ભંગ કરતા સુરતી વાહન ચાલકો જ જોવા મળે છે. પરંતુ સરકારી અને પાલિકાના બસ ચાલકો દ્વારા નિયમનો ભંગ થાય છે તેની સામે કોઈ કાર્યવાહી થતી નથી. ટ્રાફિક નિયમન માટે પોલીસના આ બેવડા ધોરણ સુરતમાં અકસ્માતને આમંત્રણ આપી રહ્યાં છે.
સુરતના પાલનપોર વિસ્તારમાં પાલથી રોયલ ડાઈંગ આવતા નવા બનેલા સીસી રોડ પર પાલિકાની સીટી બસ ચાલકે સુરત ટ્રાફિકના નિયમોના ધજાગરા ઉડાવી રોંગ સાઈડ બસ દોડાવી પોતાની સાથે અનેક વાહન ચાલકોના જીવ જોખમમાં મુકી દીધા હતા. આજે 7મી મે ના રોજ સવારે 8-30 વાગ્યે અચાનક પાલ-સુડા આવાસ ગલીમાંથી સિટી બસ પુર ઝડપે નીકળી હતી અને પાલનપોર તરફ રોંગ સાઈડ દોડવા લાગી હતી.
ટ્રાફિકના નિયમોનું પાલન કરીને આવતા વાહન ચાલકો સામે પુર ઝડપે સોંગ સાઈડ દોડતી સીટી બસ જોઈ ગભરાઈ ગયા હતા. સીટી બસ અચાનક રોંગ સાઈડ પરથી ધસી આવતા બાઈક ચાલક અને અન્ય વાહનચાલકોને બ્રેક મારીને વાહન સાઈડમાં લેવા પડ્યા હતા. બસ અને સામે આવતા વાહનો વચ્ચે એક સમયે અકસ્માત સર્જાય તેવી ભયજનક સ્થિતિ ઉભી થઈ ગઈ હતી. ખાસ કરીને વહેલી સવારે કામ પર નીકળતા લોકો માટે આઘાતજનક બની ગયું હતું.
હાલમાં પોલીસ હેલ્મેટના કાયદાનું કડક પાલન કરી સુરતીઓ પાસે લાખો રૂપિયાનો રોજ દંડ વસૂલી રહી છે તો બીજી તરફ પાલિકાની સિટી બસના ચાલકો ટ્રાફિક સિગ્નલનો તો ભંગ કરી રહ્યાં છે અને કાયદાનું પાલન કરતા વાહન ચાલકો સામે જોખમ ઉભુ કરી રહ્યાં છે તેની સામે પોલીસ કે પાલિકા કોઈ પગલાં ભરતી ન હોવાથી સુરતીઓને અકસ્માતનું જોખમ ઉભુ થઈ રહ્યું છે.
