વડોદરાઃ વડોદરામાં મોટેપાયે દારૃનું નેટવર્ક ચલાવનાર લાલુ સિન્ધી ગેંગ સામે ગુજસીટોક હેઠળ ગુનો નોંધાયા બાદ એસીપી દ્વારા સૂત્રધાર લાલુ અને સુનિલની પ્રોપર્ટી તેમજ સંપર્કોની વિગતો એકત્રિત કરવામાં આવી રહી છે.
વડોદરામાં સ્ટેટ મોનિટરિંગ સેલે તાજેતરમાં નંદેસરી અને જવાહરનગર પોલીસ સ્ટેશન વિસ્તારમાં દરોડો પાડી દારૃ અને વાહનો મળી કુલ રૃ.પોણા બે કરોડ જેટલો મુદ્દામાલ કબજે કર્યો હતો.ત્યારબાદ વડોદરા પોલીસે ગુજસીટોક હેઠળ ગુનો નોંધી એસીપી પીએન કટારિયાને તપાસ સોંપી હતી.
એસીપીએ સૂત્રધાર લાલચંદ ઉર્ફે લાલુ ખાનાણી અને સુનિલ ઉર્ફે અદો કેવલરામાણીને રિમાન્ડ પર લઇ મિલકતો તેમજ નેટવર્ક બાબતે પુરાવા એકત્રિત કરવાની કાર્યવાહી હાથ ધરી છે.જેમાં આ ગેંગના ગુજરાતના લિકર કિંગ કહેવાતા બાબુ મારવાડી અને અશોક પાલનપુરી સાથે અગાઉ સંપર્કો હોવાની વિગતો આરોપીઓની પૂછપરછમાં ખૂલતાં પોલીસ પુરાવા એકત્રિત કરશે.આ સાથે રાજ્યના બીજા પણ બુટલેગરો સાથેના સંપર્કો તેમજ હરિયાણાથી આવતા દારૃના નેટવર્કની પણ તપાસ કરવામાં આવી રહી છે.
એસીપીએ કહ્યું છે કે,સુનિલ ઉર્ફે અદાએ પાર્ટનરશિપમાં સનફાર્મા રોડ પર દસેક દુકાનોમાં રોકાણ કર્યું હોવાની પણ માહિતી મળતાં તે મુદ્દે સ્થળ તપાસ કરવાની અને પુરાવા મેળવવાની કવાયત હાથ ધરવામાં આવી છે.આવી જ રીતે લાલુની પણ મિલકતો બાબતે કાર્યવાહી કરવામાં આવશે.
બુટલેગરોનું ક્રોસ ઇન્ટ્રોગેશન,બેન્કની ડીટેલ મળી,રોકડમાં વ્યવહાર
પોલીસ દ્વારા રિમાન્ડ પર લેવાયેલા લાલુ અને સુનિલના બેન્ક ખાતાઓની ડીટેલ મળતાં તેની તપાસ ચાલી રહી હોવાનું પોલીસે કહ્યું છે.એસીપીના કહ્યા પ્રમાણે,બંને જણાનું ક્રોસ ઇન્ટ્રોગેશન પણ કરવામાં આવી રહ્યું છે.દારૃના ધંધામાં મોટાભાગના વ્યવહાર રોકડમાં થતા હતા.
