વડોદરા, તા.30 રેલવેમાં ટિકિટ બુકિંગ કરતા ૪૪ વર્ષના કર્મચારીએ વડોદરા રેલવે સ્ટેશન પર આવેલી ગોલ્ડન ટેમ્પલ એક્સપ્રેસ ટ્રેનના ફર્સ્ટ એસી કોચમાં ફિઝિયોથેરાપીની ૨૨ વર્ષની વિદ્યાર્થિનીની એકલતાનો લાભ લઇ છેડતી કરતા પોલીસે ગુનો નોંધ્યો છે.
મહારાષ્ટ્રના થાણે ખાતે રહેતી ૨૨ વર્ષની યુવતીએ રેલવે પોલીસમાં નોધાવેલી ફરિયાદમાં જણાવ્યું છે કે હું વડોદરાની ખાનગી યુનિવર્સિટીમાં ફિઝિયોથેરાપીનો અભ્યાસ કરૃ છું અને હોસ્ટેલમાં રહું છું. અમારા ઘરના સભ્યોના છેલ્લા ૨૦ વર્ષથી રેલવેમાં ટિકિટ બુકિંગ કાઉન્ટર તરીકે નોકરી કરતા સંજય બાબુલાલ મીણા (રહે.નાલાસોપારા, મુંબઇ જિલ્લો) સંપર્કમાં છે જેમને હું અંકલ તરીકે બોલાવું છું.
તા.૧ એપ્રિલના રોજ હું કોલેજમાં હતી ત્યારે સંજયકુમારે વોટ્સએપથી પૂછ્યું કે હું આજે વડોદરાથી મુંબઇ જઉં છું, તારે મુંબઇ આવવું છે. પરંતુ મે ના પાડી હતી અને મારી પાસે એક ડ્રેસ છે જે માસીને મોકલવાનો છે, શું તમે લઇ જશો તેમ પૂછતા તેમણે હા પાડી હતી. ત્યારબાદ તે દિવસે સાંજે ડ્રેસ આપવા માટે હું વડોદરા રેલવે સ્ટેશન પર ગઇ હતી અને ત્યાં ગોલ્ડન ટેમ્પલ એક્સપ્રેસ ટ્રેન પાસે ઊભેલા સંજયકુમારને મળી ડ્રેસ આપ્યો હતો.
તે વખતે સંજયકુમારે મને જણાવેલ કે ફસ્ટે ક્લાસ એસી કોચ કેવો હોય છે તે જોવો છે? પરંતુ મેં ના પાડી પરંતુ તેમણે બહુ આગ્રહ કરતા હું તેમની સાથે કોચ જોવા ગઇ ત્યારે દરવાજો બંધ થઇ ગયો હતો. આ સાથે જ સંજયકુમારે મને ગળે લગાવી બિભત્સ હરકતો કરવા લાગ્યો હતો અને પાંચ મિનિટ તને પ્રેમ કરવા માંગું છું તેમ કહેતા મેં તેને ધક્કો મારી કોચમાંથી બહાર નીકળી ભાગી ગઇ હતી. આ ઘટના બાદ કોલેજમાં ઇન્ટરનલ પરીક્ષા હોવાથી જે તે સમયે ફરિયાદ આપવાનું ટાળ્યું હતું. ઉપરોક્ત ફરિયાદના પગલે પોલીસે સંજયકુમારનો સંપર્ક કરવાનો પ્રયત્ન કરતા તેનો ફોન બંધ આવે છે.
