સમગ્ર વિશ્વમાં તા. 3 જૂનના રોજ વિશ્વ સાયકલ દિવસ તરીકે મનાવવામાં આવે છે : બળદગાડા તથા ઘોડાગાડીના યુગમાં સાયકલ માલેતુજારોનું દબદબાભર્યું પરિવહન સાધન હતું
પ્રભાસપાટણ, : સમગ્ર વિશ્વમાં તા. 3 જૂનના રોજ વિશ્વ સાયકલ દિવસ તરીકે મનાવવામાં આવે છે. એક સમયે સાયકલના પ્રવેશથી લોકોની લાઈફ સ્ટાઈલ બદલાઈ ગઈ હતી. જેના ઘરમાં સાયકલ હોય એ વ્યકિત મોભાદાર અને સંપતિવાન મનાતો હતો. સુખદુખમાં એમની પાસેથી લોકો સાયકલ માંગીને લઈ જતા હતા. પ્રભાસપાટણમાં એક જમાને સાયકલ ભાડે આપતા અનેક સાયકલ સ્ટોર અસ્તિત્વ ધરાવતા હતા.
સાયકલની શોધથી માનવ પરિવહનમાં મોટી ક્રાંતિ આવી હતી. જેને બાઈક ચલાવવું હોય એણે સૌ પ્રથમ સાયકલ શીખવી જ પડે આ સ્થિતિ આજે પણ છે. જયારથી ઓટોમોબાઈલ યુગ વધી ગયો ત્યારથી સાયકલની જરૃરિયાત ઘટી છે. લોકો શારીરિક શ્રમને બદલે બાઈક સ્કૂટરના ઉપયોગ કરવા લાગ્યા પછી સ્વાસ્થ્યના અનેકવિધ સવાલો થવા લાગ્યા છે. જો કે સાવધાન બની ગયેલા હેલ્થ કોન્સિયશ લોકો હવે સાયકલ તરફ વળી રહ્યા છે. આજે વેરાવળ પ્રભાસપાટણમાં આશરે ૨૫ જેટલી સાયકલની દુકાનો આવેલી છે. ત્યાં નવી સાયકલ ફિટ થાય છે એ ઉપરાંત સાયકલ રિપેરિંગ પણ કરવામાં આવે છે.
એક યુગ હતો કે લોકો પાસે નાણાની અછત હતી એ જમાને સાયકલનુુ મહત્વ અને સાયકલ ધરાવનારી વ્યકિતનો મોભો ખૂબજ વધી જતો હતો. લોકો સાયકલ પર ગામતરા કરવા નીકળી પડતા હતા. સાયકલનો વ્યાપ વધી જતા અંગ્રેજ રાજશાહીકાળમાં લાયસન્સપ્રથા અમલી બની હતી. જેમાં સાયકલ ચલાવનારાએ લાયસન્સ લેવું ફરજિયાત હતું વળી સાયકલમાં લાલટેન કે ડાયનેમો રાખવો પણ ફરજિયાત હતો. ઓવરસ્પીડમાં સાયકલ ચલાવનારાને કોર્ટમાં હાજર થઈ દંડ ભરવો પડતો હતો.
