Chhota Udepur News: છોટાઉદેપુર નગરપાલિકાના પ્રમુખ મંજુલાબહેન કોલીના જાતિના પ્રમાણપત્રને લઈને સ્થાનિક વહીવટી તંત્ર દ્વારા વારંવાર લેખિત જાણ કરવા છતાં પ્રમુખ જાતિનો દાખલો રજૂ ન કરતા આખરે મામલતદારે નોટિસ ફટકારી છે. તંત્ર દ્વારા પ્રમુખના ઘર પર નોટિસ ચોંટાડીને માત્ર એક જ દિવસમાં દાખલો જમા કરાવવાનું અલ્ટીમેટમ આપવામાં આવ્યું છે.
બે વખતની નોટિસ ઘોળીને પી ગયા, ત્રીજી વખત તંત્ર લાલઘૂમ
મળતી વિગતો મુજબ, છોટાઉદેપુર નગરપાલિકાના પ્રમુખ મંજુલાબહેન કોલીના જાતિના દાખલા સામે કેટલાક પ્રશ્નો ઉભા થતા મામલતદાર કચેરી દ્વારા તેની ચકાસણી હાથ ધરવામાં આવી છે. આ અંગે અગાઉ મામલતદાર દ્વારા પ્રમુખને તેમનો અસલ જાતિનો દાખલો કચેરી સમક્ષ જમા કરાવવા માટે બે વખત લેખિતમાં જાણ કરવામાં આવી હતી. આમ છતાં, પાલિકા પ્રમુખ દ્વારા કોઈ દાખલો જમા કરાવવામાં આવ્યો નહોતો.
ઘરના દરવાજે નોટિસ ચોંટાડવામાં આવી!
આ મામલે મામલતદાર કચેરીના સ્ટાફે પ્રમુખના ઘરે નોટિસ ચોંટાડી છે. આ ઉપરાંત એક નકલ મામલતદાર કચેરીના સત્તાવાર નોટિસ બોર્ડ પર પણ સાર્વજનિક રીતે લગાવવામાં આવી છે.
નોટિસમાં સ્પષ્ટ ચેતવણી આપવામાં આવી છે કે, જો આગામી એક દિવસમાં જાતિનો દાખલો મામલતદાર સમક્ષ રજૂ કરવામાં નહીં આવે, તો સત્તાવાર પ્રક્રિયા કરીને તે દાખલાને સીધો જ ‘રદબાતલ’ જાહેર કરી દેવામાં આવશે. જો જાતિનો દાખલો રદ થાય, તો મંજુલાબહેનનું પાલિકા સભ્યપદ અને પ્રમુખપદ બંને જોખમમાં મુકાઈ શકે છે.
