Chhota Udepur Accident News: છોટા ઉદેપુર જિલ્લાના પાવી જેતપુર તાલુકામાંથી એક ગમખ્વાર અકસ્માતના સમાચાર સામે આવ્યા છે. પાવી જેતપુરના સુસ્કાલ ગામના રણાફળિયા નજીક એક બેકાબૂ ટ્રક અને ટ્રેક્ટર વચ્ચે જોરદાર અકસ્માત સર્જાયો હતો. જેમાં ટ્રેક્ટરચાલક 30 વર્ષીય આશાસ્પદ યુવકનું ઘટનાસ્થળે જ મોત નીપજ્યું હતું.
ખાતર ખાલી કરીને પરત ફરતા સમયે નડ્યો અકસ્માત
મળતી માહિતી અનુસાર, સુસ્કાલ ગામના કેટલાક યુવાનો ટ્રેક્ટરમાં ખાતર ભરીને ગયા હતા. ખેતરમાં ખાતર ખાલી કરીને જ્યારે આ યુવાનો ટ્રેક્ટર લઈને પરત ફરી રહ્યા હતા, ત્યારે સુસ્કાલ ગામના રણાફળિયા નજીક સામેથી આવી રહેલી એક ટ્રકે ટ્રેક્ટરને જોરદાર ટક્કર મારી હતી. અકસ્માત એટલો ભયાનક હતો કે ટ્રેક્ટરના ચાલક અને સુસ્કાલ ગામના વતની 30 વર્ષીય ઘનશ્યામભાઈ રાઠવાનું ગંભીર ઈજાઓ થવાના કારણે કરૂણ મોત નીપજ્યું હતું.
આ પણ વાંચો: અમદાવાદમાં: કારમાંથી વિદેશી દારૂની 1800થી વધુ બોટલો સાથે રાજસ્થાનનો શખસ ઝડપાયો, પોલીસે 7 લાખનો મુદ્દામાલ કર્યો જપ્ત
પોલીસે ઘટનાસ્થળે પહોંચી તપાસ હાથ ધરી
અકસ્માતની જાણ થતાં જ આસપાસના સ્થાનિક લોકો અને રાહદારીઓ મોટી સંખ્યામાં ઘટનાસ્થળે દોડી આવ્યા હતા. આ અંગે તાત્કાલિક પોલીસને પણ જાણ કરવામાં આવી હતી. ઘટનાની ગંભીરતાને જોતા પોલીસ કાફલો તુરંત ઘટનાસ્થળે પહોંચી ગયો હતો અને કાયદેસરની કાર્યવાહી શરૂ કરી હતી.
