Vadodara Corporation : વડોદરા મ્યુનિસિપલ કોર્પોરેશન દ્વારા શહેરના ટીપી 13 વિસ્તારમાં માર્ગ વિકાસને અવરોધરૂપ બનતા ગેરકાયદે દબાણો સામે કાર્યવાહી હાથ ધરી 24 મીટર ટીપી મુખ્ય માર્ગ પરના 31 દબાણો દૂર કરવામાં આવ્યા હતા.
કોર્પોરેશનની દબાણ શાખાની ટીમે આજે એન.જે. મેટલથી મધુનગર બ્રિજ તરફ જતા માર્ગ પર કામગીરી હાથ ધરી હતી. 24 મીટર પહોળા ટીપી મુખ્ય માર્ગમાં આવતા વિવિધ પ્રકારના દબાણો દૂર કરીને માર્ગને ખુલ્લો કરવામાં આવ્યો હતો.
કાર્યવાહી દરમિયાન કમ્પાઉન્ડ વોલ, શેડ, ઓટલા, કાચા-પાકા મકાનો, દાદર સહિતના ગેરકાયદે બાંધકામો તોડી પાડવામાં આવ્યા હતા. ઉપરાંત અંદાજે ત્રણ ફૂટ પહોળો મોટો શેડ પણ દૂર કરવામાં આવ્યો હતો.
દબાણ હટાવવાની કામગીરી દરમિયાન કાયદો અને વ્યવસ્થા જળવાઈ રહે તે માટે ફતેગંજ પોલીસનો સ્ટાફ બંદોબસ્તમાં તૈનાત રહ્યો હતો. આ ઉપરાંત ટાઉન પ્લાનિંગ (ટીપી) વિભાગ, ફાયર વિભાગ, એમજીવીસીએલ, સ્ટ્રીટ લાઇટ વિભાગ, મેડિકલ વિભાગ સહિતની વિવિધ ટીમોના અધિકારીઓ અને કર્મચારીઓ પણ હાજર રહ્યા હતા. આ કામગીરી દરમિયાન કુલ 31 ગેરકાયદે દબાણો દૂર કરવામાં આવ્યા હતા.
