ગુજરાતની તપોભૂમિ પર તા.20 સપ્ટેમ્બર 2026ને રવિવારના રોજ માલધારી સમાજની ઉદ્દાત સમાજસેવા, શૈક્ષણિક ચેતના, સાહિત્યિક સાધના અને સામાજિક સમર્પણ પરંપરાને બિરદાવતો એક અલૌકિક, અભૂતપૂર્વ તથા ઐતિહાસિક કાર્યક્રમ ગાંધી આશ્રમ, ઝીલીયાના પાવન આંગણે,યુવા કર્મઠ શિક્ષક ડૉ.અલ્પેશભાઈ દેસાઈ તથા ગાંધી આશ્રમ ઝીલીઆ આયોજિત અવસર ખૂબ જ દબદબાભેર ઉજવાયો. આ ભવ્ય કાર્યક્રમમાં ગુજરાતના તપસ્વી સંતો, સામાજિક શિરોમણીઓ,શ્રષ્ઠીઓ, સમાજસેવકો અને સાહિત્યકારોનું એક જ મંચ પર શુભાગમન થતાં સમગ્ર વાતાવરણ ભક્તિ,હર્ષ-ઉલ્લાસ, અને કર્મ પ્રેરણા પ્રદાનમય બની ગયું હતું.
કાર્યક્રમનું મુખ્ય આકર્ષણ કહો કે નિમિત્ત, ડૉ.અલ્પેશભાઈ દેસાઈ મોયદ દ્વારા લિખિત “મુઠ્ઠી ઊંચેરા માલધારી” પુસ્તકનું ગરિમાપૂર્ણ વિમોચન હતું. આ કૃતિ માલધારી સમાજના ઈતિહાસ, જીવનસંઘર્ષ,ઉત્થાન સાધના અને સામાજિક- સાંસ્કૃતિ મૂલ્યોને વાચા આપતો એક ઉત્કૃષ્ટ સાહિત્યિક દસ્તાવેજ છે. આ પ્રસંગે
ગ્રામોઉત્થાન,શિક્ષણ,સહકાર,ઉદ્યોગસાહસ,કેળવણી,સાહિત્ય,ગૌસેવા, જનજાગરણ વગેરે વિવિધક્ષેત્રે વૈવિધ્યપૂર્ણ રીતે સમાજસેવામાં કાર્યરત સમાજસેવકો,ઉદ્યોગ સાહસિકો, કેળવણીકારો,સાહિત્યકારો વગેરે વગેરે મહાનુભાવોને ‘માલધારી રત્ન પુરસ્કાર’ તથા ‘માલધારી ગૌરવ પુરસ્કાર’ એનાયત કરીને તેઓના શ્રેષ્ઠ કાર્યોને આદરપૂર્વક બિરદાવવામાં આવ્યા હતાં.
આ ગૌરવવંતા સમારોહના પ્રમુખપદે આદરણીય માલજીભાઈ (ઝીલીયા), પરમ પૂજ્ય વાળીનાથ ધામના મહંતશ્રી જયરામગીરી બાપુ, દૂધરેજ ધામના લઘુમહંતશ્રી નાગરદાસ બાપુ તથા સમાજશ્રેષ્ઠી જેવા ધર્મધુરંધરો અને સમગ્ર ગુજરાત કક્ષાએથી ઉત્સાહિત સામાજિક-રાજકીય,કિસાન અગ્રણીઓની પાવન ઉપસ્થિતિએ આયોજનને આધ્યાત્મિક અને સામાજિક ભવ્યતા બક્ષી હતી.
સમાજની પ્રગતિનો મુખ્ય આધાર શિક્ષણ છે, તે વાતને સાર્થક કરતા આ મંચ પરથી શૈક્ષણિક તથા સમાજસેવી સંસ્થાઓનું પણ વિશેષ બહુમાન કરવામાં આવ્યું હતું.સમાજસેવા સાથે સંકળાયેલ અનેક યુવા ટીમ તથા સોશિયલ નેટવર્કિંગ-મીડિયાકર્મીઓને પણ આવકાર્યા હતા
સંતોના આશીર્વાદ,શિક્ષણ- સાહિત્યના મનોહર સંગમ અને કર્તવ્યનિષ્ઠ સમાજસેવકોના બહુમાનથી ઉજ્જવળ બનેલો આ સમારોહ ગુજરાતના માલધારી સમાજમાં એકતા, શિક્ષણ અને સામાજિક- સાંસ્કૃતિ જતનની દીવાદાંડી સમાન બની રહ્યો.જાણે કે ડૉ.અલ્પેશભાઈ અને એમની સમગ્ર સેવા સમર્પિત ટીમે નવી દિશાના ઓજસ્વી સૂર્યોદયનાં વધામણાં લઈને આવ્યો હોય!!
