વડોદરાઃ એમ.એસ.યુનિવર્સિટીની ટેકનોલોજી ફેકલ્ટીના ટેક્સટાઈલ કેમેસ્ટ્રી વિભાગના સંશોધકોએ લીલી ચા, લીમડો અને તુલસીના અર્કનો ઉપયોગ કરીને મચ્છરોને દૂર રાખતું ઈકો ફ્રેન્ડલી કાપડ બનાવ્યું છે.લેબોરેટરીમાં આ કાપડ પરના વિવિધ પરીક્ષણના ઉત્સાહજનક પરિણામ મળ્યા છે.
સંશોધકોની ટીમમાં વિભાગના વરિષ્ઠ અધ્યાપક ડો.ભરત પટેલ, અધ્યાપક દેવાંગ પંચાલ અને વિદ્યાર્થી જયંત પાટીલનો સમાવેશ થાય છે.આ ટીમનું નેતૃત્વ કરનાર ડો.ભરત પટેલ કહે છે કે, અમે લીલી ચા, લીમડો અને તુલસીના અર્કનું મિશ્રણ કરીને કોટન કાપડ પર તેનું કોટિંગ કર્યું હતું.જે રીતે ફેકટરીઓમાં કપડા પર ડાય કરવામાં આવે છે તે જ રીતે આ કોટિંગ કરવામાં આવ્યું હતું.કુદરતી અર્કમાં રહેલા ગુણધર્મોના કારણે ડેન્ગ્યુ, ચિકન ગુનિયા અને મેલેરિયા જેવી બીમારીઓ ફેલાવતા મચ્છરો તેનાથી દૂર રહે છે અને વાતાવરણમાં રહેલા ઈ કોલાઈ બેક્ટેરિયાનો પણ તેનાથી નાશ થતો હોવાનું લેબોરેટરીમાં કરેલા અખતરામાં પૂરવાર થયું છે.ઉપરાંત સૂર્યના હાનિકારક અલટ્રા વાયોલેટ કિરણોની તિવ્રતા પણ આ કાપડ ઓછી કરી શકે છે.ડો.પટેલનું કહેવું છે કે, ૩૦ વખત સુધી વોશ કરવામાં આવે ત્યાં સુધી કાપડ પરના કોટિંગની અસરકારકતા જળવાઈ રહે છે.
