મુંબઈ : નેશનલ સ્ટોક એક્સચેન્જે (એનએસઈ) ૩૦, ડિસેમ્બર ૨૦૨૫ના દિવસના અંતથી નિફટી ૫૦ ફયુચર્સ અને ઓપ્શન્સ કોન્ટ્રેક્ટસ માટેની લોટ સાઈઝ ૭૫થી ઘટાડીને ૬૫ કરવાનો નિર્ણય લીધો છે. આ ફેરફારો સેબીની સમયાંતરે સમીક્ષા માટેની માર્ગદર્શિકા મુજબ, ઘણા મુખ્ય ઈન્ડેક્સ ડેરિવેટીવ્ઝ માટે માર્કેટ લોટ સાઈઝમાં વ્યાપક અપડેટનો એક ભાગ છે. આ ફેરફારો ખાસ કરીને ૩૦, ડિસેમ્બર પછી એક્સપાયર થતા ત્રિમાસિક અને અર્ધ-વાર્ષિક કોન્ટ્રેક્ટસ પર લાગુ થશે. જ્યારે વિકલી અને માસિક કોન્ટ્રેક્ટસ તે તારીખ સુધી હાલના લોટ સાઈઝ સાથે ચાલુ રહેશે.
એનએસઈ દ્વારા વિવિધ અન્ય ડેરિવેટીવ્ઝ ઈન્ડેક્સ માટે લોટ સાઈઝમાં ફેરફારો કર્યા છે. જેમાં બેંક નિફટી માટે ૩૫થી ઘટાડીને ૩૦, નિફટી ફાઈનાન્શિયલ સર્વિસિઝની ૬૫થી ઘટાડીને ૬૦, નિફટી મિડ સિલેક્ટ ૧૪૦થી ઘટાડીને ૧૨૦ અને નિફટી નેક્સ્ટની ૨૫ જાળવી રાખવામાં આવી છે.
આ અપડેટેડ લોટ સાઈઝ તબક્કાવાર અમલી બનશે. વિકલી અને માસિક કોન્ટ્રેક્ટસની ફેરફાર કરાયેલા લોટ સાઈઝ જાન્યુઆરી ૨૦૨૬ એક્સપાયરી સાથે અમલી બનશે. આ દરમિયાન ત્રિમાસિક અને અર્ધવાર્ષિક કોન્ટ્રેક્ટસ ફેરફારો ૩૦, ડિસેમ્બર ૨૦૨૫થી અમલી બનશે. લોટ સાઈઝમાં ફેરફારા ઉપરાંત એનએસઈએ સ્પષ્ટતા કરી છે કે, કેટલાક કોન્ટ્રેકટ કોમ્બિનેશનને ડે સ્પ્રેડ ઓર્ડર બુક એક્સસ કરવાથી પ્રતિબંધિત કરવામાં આવશે. અસરગ્રસ્ત કોમ્બિનેશનમાં નવેમ્બર ૨૦૨૫, જાન્યુઆરી ૨૦૨૬, ડિસેમ્બર ૨૦૨૫- જાન્યુઆરી ૨૦૨૬ અને ડિસેમ્બર ૨૦૨૫- ફેબુ્રઆરી ૨૦૨૬નો સમાવેશ થાય છે. ટ્રેડરો અને મેમ્બરોને સલાહ આપવામાં આવે છે કે, તેમણે તેમની સ્પ્રેડ ટ્રેડિંગ વ્યુહરચનાઓનું આયોજન કરતી વખતે આ મર્યાદાઓને ધ્યાનમાં લેવી.
સરળ સંક્રમણ્ સુનિશ્ચિત કરવા માટે, એનએસઈએ તેના ટ્રેડિંગ મેમ્બરોને સૂચના આપી છે કે, તેમણે ત્રિમાસિક અને અર્ધ-વાર્ષિક ડેરિવેટિવ કોન્ટ્રેક્ટસમાં ઓપન પોઝિશન ધરાવતા ગ્રાહકોને લોટ સાઈઝમાં ફેરફાર વિશે સક્રિયપણે જાણ કરે. વધુમાં, તમામ ટ્રેડિંગ સિસ્ટમ્સ અને એપ્લિકેશન્સને નવીનતમ કોન્ટ્રાક્ટ ફાઈલોનો ઉપયોગ કરીને અપડેટ કરવી આવશ્યક છે.
