GST Reforms : નાણામંત્રી નિર્મલા સીતારમણે 8 મહિના જૂનો કિસ્સો સંભળાવીને GSTમાં ફેરફાર અંગે ચોંકાવનારી વાત કહી છે. તેમણે કહ્યું કે, ‘વડાપ્રધાન નરેન્દ્ર મોદી (PM Narendra Modi)નો સીધો ફોન કોલ આવ્યા બાદ લગભગ 400 વસ્તુઓ અને સેવાઓ પર ટેક્સ સ્લેબમાં ફેરફાર કરવાનું કાર્ય શરૂ થયું હતું. લગભગ આઠ મહિના પહેલા બજેટ રજૂ કરતાં પહેલાં વડાપ્રધાને મને ફોન કરીને જીએસટીને લોકો માટે સરળ બનાવવાનો નિર્દેશ આપ્યો હતો. તેમની આ પહેલે જીએસટી સુધારાના અભિયાનને એક નવી દિશા આપી હતી.’
અમે સામાન્ય લોકોના હિતને ધ્યાને રાખી ટેક્સ સ્લેબ તૈયાર કરીએ છીએ : સીતારમણ
સીતારમણે (Nirmala Sitharaman) કહ્યું કે, અમે ટેક્સ સ્લેબને માત્ર આવકની દ્રષ્ટીએ તૈયાર કરતા નથી. અમે સામાન્ય લોકો રોજિંદા જીવનમાં શું ખરીદે છે અને ખેડૂતો કઈ વસ્તુઓ પર નિર્ભર છે, તે તમામ બાબતો ઊંડાણપૂર્વક ધ્યાને લઈને ટેક્સ સ્લેબ તૈયાર કરીએ છે. અમારા ટેક્સ સ્લેબના ફેરફારના કારણે ગરીબો, ખેડૂતો અને MSME પર કેવી અસરો પડશે તે તમામ બાબતોને ધ્યાને લઈએ છીએ.
GST ફેરફાર વખતે પોપકોન જેવી બાબતને પણ ધ્યાને લેવાઈ
તેમણે વધુમાં કહ્યું કે, ‘અમે જીએસટીમાં ફેરફારની કામગીરી કરતી વખતે ચેપ્ટર વાઈસ ટેક્સ વર્ગીકરણ કરવાની બાબતનો ઉપયોગ કર્યો નથી, પરંતુ અમે સામાન્ય લોકોના વપરાશની વસ્તુઓ, ખેડૂતો માટે જરૂરી વસ્તુઓ અને મોંઘી કે વૈભવી વસ્તુઓને ધ્યાને રાખીને ફેરફાર કર્યો છે.’ તેમણે મજાકમાં કહ્યું કે, જ્યારે અમે જીએસટી ફેરફાર સુધારવા વખતે પોપકોન જેવી વસ્તુઓને પણ ચર્ચામાં લીધી હતી.
આ પણ વાંચો : ‘અમે રશિયાથી ઓઈલ ખરીદતા રહીશું’, ટેરિફ વિવાદ વચ્ચે નાણામંત્રી સીતારમણનો અમેરિકાને જવાબ
ટેક્સ સ્લેબમાં રાહતથી ગ્રાહકને મોટો ફાયદો થશે
તેમણે કહ્યું કે, અમે સૌથી મોટો ફેરફાર GST સ્લેબમાં કર્યો છે. અમે 12 ટકા અને 18 ટકા જેવા જટિલ સ્લેબ ખતમ કરી દીધા છે અને 99 ટકા પ્રોડક્ટ પાંચ ટકા અને 18 ટકાના સ્લેબમાં લાવી દીધી છે. હવે આ નિર્ણયના કારણે ગ્રાહકોને મોટો લાભ થશે અને ઉદ્યોગ જગતની ટેક્સ વ્યવસ્થામાં સ્પષ્ટતા જોવા મળશે.
‘મને અઘરી પરીક્ષા પાસ કરવા જેવું લાગ્યું’
તેમણે એમ પણ કહ્યું કે, જ્યારે હું મે મહિનામાં જીએસટી ફેરફારનો પ્રસ્તાવ લઈને વડાપ્રધાન પાસે પહોંચી હતી, ત્યારે મને અઘરી પરીક્ષા પાસ કરવા જેવો અનુભવ થયો હતો. ત્યારબાદ દિલ્હી સ્કૂલ ઓફ ઈકોનોમિક્સમાં અઘરી પરીક્ષા પાસ કર્યા પર સંતોષ મળે છે, તેવો અનુભવ થયો હતો.
આ પણ વાંચો : ટ્રમ્પના કારણે અમેરિકાની અધોગતિ, બેરોજગારી-મોંઘવારી વધી, વીજળીની કિંમતો આસમાને
