BioMetrics Payment Mode: PhonePe દ્વારા હવે Unified Payments Interface (UPI) ટ્રાન્ઝેક્શન માટે બાયોમેટ્રિક ઓથેન્ટિકેશન સર્વિસ શરૂ કરવામાં આવી છે. આ નવા ફીચર દ્વારા યુઝર્સ ફિંગરપ્રિન્ટ સ્કેનર અથવા ફેશિયલ રિકગ્નિશન ટેક્નોલોજીનો ઉપયોગ કરીને પેમેન્ટને મંજૂરી આપી શકે છે. નાના ટ્રાન્ઝેક્શન માટે હવે PIN દાખલ કરવાની જરૂર નહીં રહે. આ ફીચર હાલમાં માત્ર એન્ડ્રોઇડ ડિવાઇસ પર ઉપલબ્ધ છે, જ્યારે iOS વર્ઝન માટે પણ ટૂંક સમયમાં આવશે.
કેવી રીતે કામ કરે છે?
PhonePeની નવી સિસ્ટમ સ્માર્ટફોનના ફિંગરપ્રિન્ટ સ્કેનર અથવા ફેશિયલ રિકગ્નિશનનો ઉપયોગ કરે છે. ₹5,000 સુધીના પેમેન્ટ માટે યુઝર્સ PIN નાખ્યા વગર બાયોમેટ્રિક વેરિફિકેશનથી ટ્રાન્ઝેક્શન કરી શકશે. ₹5,000થી વધુના પેમેન્ટ માટે PIN જરૂરી રહેશે. કંપનીએ જણાવ્યું છે કે આ ડિવાઇસ ટૂ-ફેક્ટર સિક્યોરિટી પર કામ કરે છે. તેમાં બાયોમેટ્રિક ડેટા ફોનમાં જ સુરક્ષિત રીતે સ્ટોર કરવામાં આવે છે. પિયર-ટુ-પિયર ટ્રાન્સફર, QR કોડ પેમેન્ટ, ઑનલાઇન ખરીદી અને બેંક બેલેન્સ ચેક જેવી રોજિંદી પરિસ્થિતિઓમાં આ ફીચરનો ઉપયોગ કરી શકાય છે.
બેકઅપ ઓપ્શન
જો બાયોમેટ્રિક વેરિફિકેશન નિષ્ફળ જાય એટલે કે બની શકે કોઈ સમયે લાઇટિંગની સમસ્યા આવે અથવા તો ફિંગરપ્રિન્ટ સેન્સર પર પરસેવો અથવા તો મોઇસ્ચર લાગી ગયું હોય અને કામ ન કરે એ સમયે યુઝર્સ તરત જ PIN આધારિત ઓથેન્ટિકેશનનો ઉપયોગ કરી શકે છે. આથી બાયોમેટ્રિકની સાથે PINનો પણ ઉપયોગ કરી શકાશે. તેમ જ ₹5,000થી વધુના પેમેન્ટ માટે PIN જરૂરી છે.
પેમેન્ટ પ્રોસેસને સરળ બનાવવી
PhonePeના હેડ ઓફ પેમેન્ટ્સ દીપ અગ્રવાલે કહ્યું કે આ ફીચર પેમેન્ટની પ્રક્રિયાને સરળ બનાવવા માટે લોન્ચ કરવામાં આવ્યું છે. તેમ જ પેમેન્ટને સરળ બનાવવાની સાથે સિક્યોરિટી સાથે કોઈ સમાધાન કરવામાં નથી આવ્યું. પાસવર્ડ ભૂલથી ખોટો નાખવાથી થતા ટ્રાન્ઝેક્શન નિષ્ફળ થતા ઘટાડવાનો પણ હેતુ છે.
બાયોમેટ્રિક ફીચરનો ઉપયોગ કેવી રીતે કરશો?
• PhonePe એપ ખોલવી
• પ્રોફાઇલમાં જવું
• Manage Payments પર ટૅપ કરવું
• Biometric Pay પસંદ કરવું
આ પણ વાંચો: ભારત માટે ખતરો! હિંદ મહાસાગરમાં 30 ટકા ખારાશ ઘટી ગઈ, ચોમાસાની પેટર્ન પર અસરની આશંકા
અન્ય કંપનીઓ પણ લાવશે આ ફીચર
ભારતમાં UPI ડિજિટલ પેમેન્ટ્સનું મુખ્ય માધ્યમ બની ગયું છે. PhonePeના આ ફીચરને કારણે અન્ય કંપનીઓ પણ બાયોમેટ્રિક ઓથેન્ટિકેશન અપનાવવા પ્રોત્સાહિત થઈ શકે છે. UPI એક એવી વસ્તુ છે જેનો ઉપયોગ દરેક યુઝર કરે છે. આથી કોઈ પણ નવા ફીચર આવે તો તેનો દરેક કંપની અમલ કરે છે.
