અંબાજીમાં દિવ્યાંગ સેવા સેતુ: દિવ્યાંગજનોના કલ્યાણ અને સશક્ત સમાજના નિર્માણ તરફ એક કદમ
બનાસકાંઠા જિલ્લા વહીવટી તંત્ર દ્વારા દિવ્યાંગજનોને સરકારની વિવિધ કલ્યાણકારી યોજનાઓ અને સુવિધાઓનો લાભ સરળતાથી મળી રહે તે હેતુસર અંબાજીની આદ્યશક્તિ જનરલ હોસ્પિટલ ખાતે ‘દિવ્યાંગ સેવા સેતુ’ કાર્યક્રમ યોજાયો હતો.
બનાસકાંઠા જિલ્લાના સી.ડી.એમ.ઓ. ડૉ. વાય. કે. મકવાણાના અધ્યક્ષસ્થાને યોજાયેલા આ કાર્યક્રમમાં મોટી સંખ્યામાં દિવ્યાંગ ભાઈ-બહેનોએ ઉપસ્થિત રહી વિવિધ સેવાઓનો લાભ લીધો હતો. જિલ્લામાં વિવિધ તાલુકાઓમાં યોજાયેલા દિવ્યાંગ સેવા સેતુ કાર્યક્રમની પૂર્ણાહુતિ અંબાજી ખાતે કરવામાં આવી હતી.
અંબાજી ખાતે યોજાયેલા કાર્યક્રમ દરમિયાન ઉપસ્થિત દિવ્યાંગજનોના જરૂરી દસ્તાવેજોની ચકાસણી કરવામાં આવી હતી તેમજ તબીબી ટીમ દ્વારા તેમની શારીરિક તપાસ પણ કરવામાં આવી હતી.
જરૂરી પ્રક્રિયા પૂર્ણ થયા બાદ પાત્ર લાભાર્થીઓને દિવ્યાંગતા પ્રમાણપત્ર આપવામાં આવશે. જિલ્લામાં અત્યાર સુધીમાં આશરે 690 જેટલા દિવ્યાંગજનોને દિવ્યાંગતા પ્રમાણપત્રો એનાયત કરવામાં આવ્યા છે. દિવ્યાંગતા પ્રમાણપત્રના આધારે લાભાર્થીઓને સરકારની વિવિધ કલ્યાણકારી યોજનાઓ તથા અન્ય સુવિધાઓનો લાભ મેળવવામાં સરળતા રહેશે.
આ પ્રસંગે બનાસકાંઠા જિલ્લાના સી.ડી.એમ.ઓ.ડૉ. વાય. કે. મકવાણાએ જણાવ્યું હતું કે, દિવ્યાંગજનોને સરકારની વિવિધ યોજનાઓનો મહત્તમ લાભ સરળતાથી મળી રહે અને જરૂરી સેવાઓ તેમના સુધી પહોંચે તે હેતુસર ‘દિવ્યાંગ સેવા સેતુ’ કાર્યક્રમનું આયોજન કરવામાં આવ્યું છે.
દિવ્યાંગજનોને જરૂરી પ્રમાણપત્રો અને સેવાઓ એક જ સ્થળેથી ઉપલબ્ધ કરાવી તેમને સશક્ત બનાવવાના પ્રયાસો કરવામાં આવી રહ્યા છે, જેથી દિવ્યાંગજનોના કલ્યાણ સાથે સશક્ત અને સમૃદ્ધ સમાજના નિર્માણમાં સહભાગિતા વધે.
