અંબાજી, સંજીવ રાજપૂત, એબીએનએસ: પ્રસિદ્ધ શક્તિપીઠ અંબાજી ખાતે આયોજિત ભાદરવી પૂનમના મહાકુંભમાં મા અંબાના દર્શનાર્થે આવતા લાખો શ્રદ્ધાળુઓની સુવિધા અને સ્વાસ્થ્ય સુરક્ષા માટે બનાસકાંઠા જિલ્લા વહીવટી તંત્ર અને જિલ્લા આરોગ્ય વિભાગ દ્વારા વ્યાપક તેમજ સુસજ્જ આયોજન કરવામાં આવ્યું છે. દુર-દૂરથી ચાલતા આવતા પદયાત્રીઓને રસ્તામાં કે ધામમાં કોઈ પણ સ્વાસ્થ્ય સંબંધિત તકલીફ ન પડે તે માટે આરોગ્ય વિભાગની ટીમો ચોવીસે કલાક તૈનાત રહીને સરાહનીય કામગીરી કરી રહી છે.
મેળા દરમિયાન સમગ્ર વિસ્તારમાં કુલ ૨૭ જેટલા આરોગ્ય કેન્દ્રો શરૂ કરવામાં આવ્યા છે. આ તમામ કેન્દ્રો પર ૨૪x૭ અલગ-અલગ તબીબી ટીમો દ્વારા નિરંતર સેવાઓ પૂરી પાડવામાં આવી રહી છે. અત્યાર સુધીમાં ૨ લાખથી વધુ ભક્તોએ આ આરોગ્ય સેવાઓનો લાભ લીધો છે.
ભક્તોની સુવિધા માટે અંબાજી મંદિરના મુખ્ય ચાચર ચોક ખાતે પણ વિશેષ આરોગ્ય કેન્દ્ર કાર્યરત કરવામાં આવ્યું છે, જ્યાં દૈનિક ૧૫૦૦થી વધુ દર્દીઓ સારવાર મેળવી રહ્યા છે. આ ઉપરાંત, ગંભીર સ્થિતિ ધરાવતા દૈનિક સરેરાશ ૫૦ જેટલા ઇમરજન્સી દર્દીઓને ત્વરિત પ્રાથમિક સારવાર આપી વધુ ઉપચાર અર્થે આગળની હોસ્પિટલોમાં રેફર કરવામાં આવે છે.
મેડિકલ ઓફિસર સુનિલ સોલંકીએ માહિતી આપતાં જણાવ્યું હતું કે, “મંદિર પરિસરમાં જો કોઈ ભક્તની તબિયત લથડે તો સૌથી પહેલાં ચાચર ચોક સ્થિત આરોગ્ય કેન્દ્ર ખાતે તેમની તબીબી તપાસ કરવામાં આવે છે. જો વધુ સારવારની જરૂરિયાત જણાય તો ૧૦૮ એમ્બ્યુલન્સ મારફતે દર્દીને તાત્કાલિક અંબાજી કોટેજ હોસ્પિટલ ખાતે ખસેડવામાં આવે છે.”
આ ઉપરાંત, આકસ્મિક પરિસ્થિતિને પહોંચી વળવા માટે અંબાજી, હડાદ અને દાંતા સરકારી હોસ્પિટલ ખાતે સ્પેશિયાલિસ્ટ ડોક્ટરોની વિશેષ ટીમો પણ તૈનાત કરી દેવામાં આવી છે.
જિલ્લા વહીવટી તંત્ર અને આરોગ્ય વિભાગના આ સુચારુ આયોજન અને ત્વરિત કામગીરીને કારણે મા અંબાના દર્શને આવતા લાખો ભક્તોને મોટી રાહત મળી રહી છે અને મહાકુંભમાં આરોગ્ય વિષયક સેવાઓ સુચારુ રૂપે ચાલી રહી છે.
