ગઢડા : રાષ્ટ્રપિતા મહાત્મા ગાંધીજીની જન્મજયંતિ નિમિત્તે ભક્તરાજ દાદા ખાચર વિનયન અને વાણિજ્ય મહાવિદ્યાલય, ગઢડા ખાતે તારીખ 01/10/2026 ના રોજ ગાંધીજયંતિની ભાવસભર ઉજવણી કરવામાં આવી હતી. મહાવિદ્યાલયના સપ્તધારા પ્રકલ્પ તથા NSS વિભાગના સહયોગથી યોજાયેલા આ કાર્યક્રમમાં મહાત્મા ગાંધીજીના જીવન, વિચારો, સંઘર્ષ અને રાષ્ટ્રસેવાના પ્રસંગોને સ્મરણ કરવામાં આવ્યા હતા.
કાર્યક્રમનું આયોજન સપ્તધારા કો-ઓર્ડિનેટર ડૉ. વિમળાબેન ચૌધરી દ્વારા મહાવિદ્યાલયના આચાર્યશ્રી ડૉ. હિંમતભાઈ સેંજલીયાના માર્ગદર્શન હેઠળ કરવામાં આવ્યું હતું.
કાર્યક્રમ દરમિયાન ડૉ. વિમળાબેન ચૌધરી, NSS વિભાગના ડૉ. ઈશ્વરભાઈ સુતરીયા તથા મહાવિદ્યાલયના આચાર્યશ્રી ડૉ. હિંમતભાઈ સેંજલીયા દ્વારા મહાત્મા ગાંધીજીના જીવન સાથે સંકળાયેલા વિવિધ પ્રેરણાદાયી પ્રસંગો રજૂ કરવામાં આવ્યા હતા. ગાંધીજીના સત્ય, અહિંસા, સાદગી, સ્વચ્છતા, સ્વાવલંબન, શિસ્ત અને રાષ્ટ્રભાવનાના વિચારોને વિદ્યાર્થીઓ સમક્ષ સરળ અને રસપ્રદ રીતે રજૂ કરવામાં આવ્યા હતા.
મહાત્મા ગાંધીજીના જીવનપ્રસંગોના માધ્યમથી વિદ્યાર્થીઓને જીવનમાં સત્યનિષ્ઠા, કર્તવ્યપરાયણતા, આત્મશિસ્ત અને રાષ્ટ્રપ્રેમ જેવા મૂલ્યો કેળવવા માટે પ્રેરણા આપી હતી. ગાંધીજીનું જીવન માત્ર એક ઐતિહાસિક વ્યક્તિત્વ તરીકે નહીં, પરંતુ મૂલ્યનિષ્ઠ અને જવાબદાર જીવન જીવવા માટેનું પ્રેરણાસ્ત્રોત છે તે બાબત પર વિશેષ ભાર મૂકવામાં આવ્યો હતો.
આ કાર્યક્રમમાં મહાવિદ્યાલયના ડૉ. જે. એ. રાણા, ડૉ. આર. એ. વાઢેર, ડૉ. એ. ડી. લાણિયા, ડૉ. હિતેશભાઈ મોરી, ડૉ. સી. એ. ગોહેલ, ચંદ્રશકુમાર ચૌહાણ સહિત તમામ વિઝિટિંગ સ્ટાફગણ તથા વિદ્યાર્થીઓ ઉત્સાહપૂર્વક ઉપસ્થિત રહ્યા હતા.
સમગ્ર કાર્યક્રમનું આયોજન મહાવિદ્યાલયના આચાર્યશ્રીના માર્ગદર્શન હેઠળ સપ્તધારા પ્રકલ્પ તથા NSS વિભાગના સહયોગથી અને IQACની મંજૂરીથી કરવામાં આવ્યું હતું. કોલેજ પરિવારે મહાત્મા ગાંધીજીના ચરણોમાં પોતાના કર્તવ્યોનાં પુષ્પો અર્પણ કરીને કાર્યક્રમની સફળતાપૂર્વક પૂર્ણાહુતિ કરી
