સાવજોની શાહી સવારી નિહાળી રાહદારીઓ મંત્રમુગ્ધઃ ધારીના મીઠાપુર ગામે લગ્ન પ્રસંગ બાદ ખાલી મંડપમાં દીપડાની લટારના ફૂટેજ વાયરલ
અમરેલી, : ધારી ગીર વનવિભાગ હેઠળના વિસ્તારમાં આજે દિવસના સમયે 11 જેટલા સિંહોનું એક વિશાળ ટોળું જંગલ વિસ્તારમાંથી નીકળીને રોડ ક્રોસ કરવા માટે સ્ટેટ હાઈવે પર આવી પહોંચ્યું હતું. સામાન્ય રીતે આ હાઈવે પર દિવસ દરમિયાન વાહનોની સતત અવરજવર રહેતી હોય છે. જોકે, વનવિભાગના કર્મચારીઓ આ બાબતે સતર્ક હતા.
છતડિયા નજીક જ્યારે સિંહોનું આ ટોળું રોડ ક્રોસ કરી રહ્યું હતું ત્યારે ફરજ પરના વનકર્મીઓએ સમયસૂચકતા વાપરીને હાઈવેની બંને બાજુનો વાહનવ્યવહાર થંભાવી દીધો હતો. જ્યાં સુધી તમામ 11 સિંહો સલામત રીતે રોડ ક્રોસ ન કરી ગયા ત્યાં સુધી વનકર્મીઓ ત્યાં ખડેપગે રહ્યા હતા અને સિંહોને રક્ષણ પૂરું પાડયું હતું. 11 સિંહો શાંતિથી એક પછી એક રોડ ક્રોસ કરતા હોવાનો વીડિયો હાલ સોશિયલ મીડિયામાં ખૂબ વાયરલ થઈ રહ્યો છે.
જયારે અન્ય એક ઘટનામાં ધારી ગીર પંથકના મીઠાપુર નક્કી ગામે એક લગ્ન પ્રસંગનું તમામ કામકાજ પૂર્ણ થઈ ગયું હતું અને મંડપ ખાલી હતો, ત્યારે રાત્રિના સુમારે એક કદાવર દીપડો શિકારની શોધમાં ગામમાં ચડી આવ્યો હતો. સોશિયલ મીડિયામાં વાયરલ થયેલા સીસીટીવી ફૂટેજમાં સ્પષ્ટ જોઈ શકાય છે કે, શણગારેલા મંડપની વચ્ચે દીપડો નિરાંતે આંટાફેરા કરી રહ્યો છે. જાણે તે કોઈ મહેમાન હોય તેમ મંડપમાં ફરી રહ્યો હતો. આ દ્રશ્યો સામે આવતા ગ્રામજનોમાં ફફડાટ ફેલાયો છે.
આ ઘટના બાદ ગ્રામજનોએ વન વિભાગ પાસે માંગ કરી છે કે ગામમાં દીપડાના આંટાફેરા વધી ગયા હોવાથી તાત્કાલિક પાંજરું મૂકીને દીપડાને પકડવામાં આવે, જેથી ભવિષ્યમાં કોઈ અનિચ્છનીય બનાવ ન બને
