– મહાપાલિકાએ 2 માસ પૂર્વે દબાણ દૂર કરવા નોટિસ આપી હતી
– 5 રૂમ, 7 ઓટલા, 15 દીવાલ, 7 દુકાન, 11 બાથરૂમ, 4 શેડ સહિતના દબાણ દૂર કરાયા
ભાવનગર : ભાવનગર શહેરમાં મહાપાલિકા દ્વારા ગેરકાયદે દબાણ અથવા રોડમાં નડતરરૂપ દબાણ હટાવવાની કામગીરી યથાવત છે, જેના ભાગરૂપે આજે સોમવારે અકવાડામાં ટી.પી. સ્કીમના રોડમાં નડતરરૂપ મકાન સહિતના દબાણ દૂર કરવામાં આવ્યા હતાં.
ભાવનગર મહાપાલિકાના એસ્ટેટ વિભાગના દબાણ હટાવ સેલની ટીમ દ્વારા આજે સોમવારે શહેરના અકવાડામાં ટીપી સ્કીમ નંબર ૨૯ માં સહજાનંદ ગુરૂકુળ કોલેજના ચોકથી પેટ્રોલ પંપ પાસે ટીપી સ્કીમની હદ સુધી ૩૦ મીટર ટીપી-ડીપી રોડમાં નડતરરૂપ ગેરકાયદે આશરે પપ દબાણ દૂર કરવામાં આવ્યા હતા, જેમાં ૦૭ ઓટલા, ૦૫ રૂમ, ૧૫ દીવાલ, ૦૭ દુકાન, ૧૧ બાથરૂમ, ૦૪ શેડ અને ૦૬ બોર્ડ/બેનર (મંજૂરી વગરના) વગેરે દબાણનો સમાવેશ થાય છે તેમ દબાણ હટાવ સેલની ટીમે જણાવ્યુ હતું.
અકવાડા ગામ સમયે બાંધકામ થયા હતા અને ત્યારબાદ ટી.પી. સ્કીમ બહાર પડતા રોડમાં દબાણ આવતા હતાં. આ દબાણ દૂર કરવા માટે મહાપાલિકાના ટાઉન પ્લાનીંગ વિભાગે બે માસ પૂર્વે રોડને નડતરરૂપ દબાણ દૂર કરવા નોટિસ આપી હતી પરંતુ તેમ છતાં દબાણ હટાવવામાં નહીં આવતા આજે મહાપાલિકાએ દબાણ તોડ પાડયા હતા તેમ માહિતી આપતા મહાપાલિકાના ટાઉન પ્લાનીંગ વિભાગના અધિકારીએ જણાવ્યુ હતું.
અકવાડાનો રોડ પહોળો કરવા માટે દબાણ દૂર કરાયા
ભાવનગર શહેરના અકવાડામાં રોડ સાંકડો હતો પરંતુ ટી.પી.સ્કીમમાં મોટો રોડ મંજૂર થયો હોવાથી આ રોડ પહોળો કરવાની કામગીરી હાથ ધરવામાં આવી છે, જેના ભાગરૂપે રોડને નડતરરૂપ મકાન સહિતના દબાણ દૂર કરવામાં આવ્યા હતા તેથી દબાણકર્તાઓમાં ફફડાટ ફેલાયો હતો.
