Ahmedabad News: અમદાવાદના વટવા વિસ્તારના બચુભાઈ કૂવા પાસે રહેતા કોંગ્રસ કાર્યકર વિશાલ સરોજ અને તેમના પરિવાર પર આશરે 3 થી 4 અસામાજિક તત્વોએ ઘાતકી હુમલો કર્યો હોવાનો ગંભીર બનાવ સામે આવ્યો છે. પ્રાથમિક માહિતી મુજબ, શેરીમાં રિક્ષા ધીમી ચલાવવા તથા જાહેરમાં ડ્રગ્સ અને ગાંજાનું સેવન ન કરવા સમજાવતા આરોપીઓ ઉશ્કેરાઈ ગયા હતા. ત્યારબાદ વધુ લોકો બોલાવી ધારિયા, ચપ્પા અને અન્ય ઘાતક હથિયારો વડે પરિવાર પર હુમલો કરી જાનથી મારી નાખવાનો પ્રયાસ કરવામાં આવ્યો હતો. પોલીસે ફરિયાદ નોંધી ત્રણ આરોપીઓની ધરપકડ કરી છે. હુમલામાં ફરિયાદી વિશાલ સરોજના ભાઈ વિનય સરોજને ગંભીર ઇજાઓ પહોંચી છે. તેમના માથાના ભાગે કુલ 11 ટાંકા આવ્યા છે અને હાલ તેઓ અમદાવાદની સિવિલ હોસ્પિટલ ખાતે સારવાર હેઠળ છે.
શું છે સમગ્ર બનાવ?
ફરિયાદ મુજબ ગઇકાલે 02 જૂનના રોજ સાંજના આશરે સાડા ચાર વાગ્યાની આસપાસ ધનરાજ ઉર્ફે તખુ નામનો શખ્સ પોતાની ઓટો રિક્ષા લઈને સોસાયટીની ગલીમાંથી પૂરઝડપે અને ગફલતભરી રીતે પસાર થઈ રહ્યો હતો. ગલીમાં અકસ્માત ન સર્જાય તે હેતુથી ત્યાંના રહીશોએ તેને રિક્ષા શાંતિથી ચલાવવા માટે ટકોર કરી હતી. આ બાબતની અદાવત રાખી થોડી જ વારમાં તખુ નામનો આ શખ્સ પરત ફર્યો હતો અને ગલીમાં આવેલા હનુમાનજીના મંદિરે બેસીને, ‘મારી રિક્ષા કોણે રોકેલી?’ તેમ કહી જાહેરમાં ગાળો બોલવા લાગ્યો હતો. જ્યારે ફરિયાદી તેને શાંતિથી બેસવા સમજાવવા ગયા, ત્યારે તખુ વધુ ઉશ્કેરાઈ ગયો હતો અને અપમાનજનક શબ્દો બોલી ઝઘડો કરવા લાગ્યો હતો.
ત્રણ ભાઈઓએ અજાણ્યા શખ્સ સાથે મળી કર્યો હુમલો
ઝઘડા દરમિયાન ફરિયાદીનો નાનો ભાઈ વિનય વચ્ચે બચાવ કરવા પડતાં, તખુએ ફોન કરીને તેના ભાઈઓ નરેન્દ્રસિંહ અને ધર્મેન્દ્રસિંહ ઝાલા તેમજ અન્ય એક અજાણ્યા ઈસમને બાઈક પર બોલાવી લીધા હતા. આ ચારેય શખ્સોએ ભેગા મળીને ફરિયાદી અને તેના ભાઈ પર હુમલો કરી ગડદાપાટુનો માર મારવાનું શરૂ કર્યું હતું. તે દરમિયાન નરેન્દ્રસિંહ ઝાલાએ પોતાની પાસે રહેલું ઘાતક ‘કુકરી ચાકુ’ કાઢીને ફરિયાદીના નાના ભાઈ વિનયના માથાના ભાગે જીવલેણ ઘા ઝીંકી દીધો હતો. નરેન્દ્રસિંહ બીજો ઘા મારવા જતો હતો ત્યારે ફરિયાદી વચ્ચે પડતાં ચાકુ ઊંધું થઈ ગયું હતું, જેથી ફરિયાદીને પીઠના ભાગે ચાકુનો મુઢમાર વાગ્યો હતો.
જાનથી મારી નાખવાની ધમકી
ઘટનાને પગલે આસપાસના લોકો બૂમાબૂમ કરી એકઠા થઈ જતાં ચારેય હુમલાખોરો ત્યાંથી નાસી છૂટ્યા હતા. ભાગતી વખતે આરોપી નરેન્દ્રસિંહ ઝાલાએ ‘હવે પછી મારી રિક્ષા રોકશો તો જાનથી મારી નાખીશ’ તેવી ધમકી પણ આપી હતી. માથાના ભાગે ગંભીર ઈજા થતાં લોહીલુહાણ હાલતમાં વિનયને તાત્કાલિક સારવાર અર્થે સિવિલ હોસ્પિટલ ખાતે ખસેડવામાં આવ્યો છે, જ્યાં હાલ તેની સ્થિતિ ગંભીર હોવાનું અને તે વાતચીત કરી શકે તેવી સ્થિતિમાં ન હોવાનું જાણવા મળ્યું છે.
આ પણ વાંચો: સાણંદના ડરણ ગામે ખેડૂતોનો હલ્લાબોલ: નોટિસ-વળતર વગર ખેતરોમાં પાઈપલાઈન નાખવા સામે રોષ, પોલીસ કાફલો ખડકાયો
આ બનાવમાં વટવા પોલીસ સ્ટેશન ખાતે BNSની કલમ 118(1), 115(2), 352, 351(3), 54 મુજબ ગુનો નોંધી કાયદેસરની કાર્યવાહી કરવામાં આવી છે. તેમજ આ ગુના ના કામેના 3 આરોપીઓની ધરપકડ કરવામાં આવી છે. આ બનાવે વટવા વિસ્તારમાં કાયદો અને વ્યવસ્થાની સ્થિતિ અંગે ગંભીર પ્રશ્નો ઉભા કર્યા છે. સ્થાનિક લોકોએ આરોપીઓ સામે કડક કાર્યવાહી કરી પીડિત પરિવારને તાત્કાલિક ન્યાય અપાવવાની માંગણી કરી છે.
