Ahmedabad News: ગુંડા તત્વોની હિંમત તો જુઓ ઘરની બહાર આવી તલવારો લહેરાવી પડકાર ફેંકી રહ્યા છે, વાઈરલ વીડિયો અમદાવાદના પૂર્વ વિસ્તારની છોટાલાલ ચાલીનો છે જ્યાં ત્રણ લુખ્ખાઓએ આખી ચાલી માથે લીધી હતી. મન ફાવે તેમ ગાળો ભાંડી તલવારો બતાવી દહેશત ઊભી કરી હતી. પોલીસે ત્રણેય આરોપીની ઘરપકડ તો કરી લીધી છે. પણ સવાલ એ છે કે જાહેરમાં આતંક મચાવતા આ ઈસમોમાંથી પોલીસનો ડર કેમ ગાયબ થઈ ગયો છે? આવા અસામાજિક તત્વો પર કડકમાં કડક કાર્યવાહી થવી જરૂરી છે જેથી બીજી વખત કોઈ હિમાકત ન કરે!
ઘરની બહાર પાર્ક કરેલા વાહનો પર તલવારથી તોડફોડ
અમદાવાદના પૂર્વ વિસ્તારમાં ફરી એકવાર કાયદો અને વ્યવસ્થાને પડકારતી ઘટના સામે આવી છે, જેમાં ગોમતીપુરની છોટાલાલની ચાલીમાં ત્રણ અસામાજિક તત્વોએ જાહેરમાં આતંક મચાવ્યો હતો. મેરાજ અંસારી, અફસર અંસારી અને ફૈઝલ અન્સારી નામના શખ્સો હાથમાં ખુલ્લી તલવારો લઈને ચાલીમાં ધસી આવ્યા હતા અને આસપાસના લોકોમાં દહેશત ફેલાવી દીધી હતી. આ શખ્સોએ ઈકબાલ પઠાણ નામના યુવકના ઘરની બહાર પાર્ક કરેલા વાહનો પર તલવાર વડે હુમલો કરી તોડફોડ કરી હતી.
સ્થાનિક રહીશોમાં ભારે ફફડાટ
પરિવારને નિશાન બનાવતા આ તત્વોએ બિભત્સ ગાળાગાળી કરી ઈકબાલ અને તેના સ્વજનોને ઘરની બહાર આવવા માટે ધમકાવ્યા હતા. જાહેરમાં શસ્ત્રો લહેરાવતા આ શખ્સોને કારણે સ્થાનિક રહીશોમાં ભારે ફફડાટ વ્યાપી ગયો હતો. આ સમગ્ર હિંસક ઘટનાના વીડિયો પણ સામે આવ્યા હતા, જેના આધારે પોલીસે તપાસ કરી હતી.
આ પણ વાંચો: અમદાવાદ TETની પરીક્ષા આપવા આવેલા હિંમતનગરના બે વિદ્યાર્થીને કારે અડફેટે લીધા, હાલત ગંભીર
ત્રણેય ઈસમોની ધરપકડ
ઘટનાની ગંભીરતાને ધ્યાને લઈને ગોમતીપુર પોલીસે કાર્યવાહી હાથ ધરી હતી. ભોગ બનનાર ઈકબાલ પઠાણની ફરિયાદના આધારે ગુનો નોંધી પોલીસે ગણતરીના કલાકોમાં જ મેરાજ, અફસર અને ફૈઝલની ધરપકડ કરી લીધી હતી. હાલ ત્રણેય આરોપીઓને જેલના હવાલે કરી પોલીસે કાયદેસરની કડક કાર્યવાહી શરૂ કરી છે.
