શહેરમાં દારૂની મહેફિલો, ગેરકાયદે હથિયારો,, સ્ટંટ અને અસામાજિક તત્વોને ઝડપી પાડવા સાથે ગુનાહિત પવૃત્તિઓ પર અંકુશ મેળવવા પોલીસ સંપૂર્ણ એક્શનમાં
અમદાવાદ, સંજીવ રાજપૂત, એબીએનએસ:
અમદાવાદમાં ગુનેગારો પર અંકુશ મેળવવા અને ગેરકાયદેસર પ્રવૃત્તિઓને ડામવા અમદાવાદ પોલીસ કમિશનરે મિડનાઈટ એકશન પ્લાન તૈયાર કર્યો છે.જેમાં દરેક પોલીસ સ્ટેશનના 25 જેટલા પોલીસકર્મીઓ દરરોજ રાત્રે પેટ્રોલિંગ, નાકાબંધી અને કોમ્બિંગ કરીને ગુનેગારો તેમજ અસાધાજિક તત્વો સામે કાયદેસરની કાર્યવાહી કરશે.શહેરમાં કુલ 49 પોલીસ સ્ટેશન આવેલા છે. ખાસ કરીને સિંધુભવન, એસ.જી. હાઇવે, એસ.પી. રિંગ રોડ, સૌ.જી. રોડ, નિકોલ સહિત સમગ્ર શહેરમાં દારૂની મહેફિલો, ગેરકાયદે હથિયારો, હિસ્ટ્રીશીટરો, સ્ટંટ અને રેસિંગ કરતા નબીરાઓને ઝડપી પાડવા અને ગુનાહિત પવૃત્તિઓ પર અંકુશ મેળવવા સૌપથમવાર આ એક્શન પ્લાન અમલમાં મુકાયો છે.
દરરોજ રાત્રે 12થી 2 વાગ્યા દરમિયાન યોજાનારા આ વિશેષ ઓપરેશન માટે શહેરના દરેક પોલીસ સ્ટેશનમાંથી 5 પોલીસ વાહનો અને અંદાજે 25 જેટલા પોલીસ અધિકારીઓ તથા કર્મચારીઓને મેદાનમાં ઉતારવામાં આવ્યા છે. પોલીસ કમિશનરે પોતે સિંધુભવન રોડ, એસ.જી. હાઇવે, સી.જી. રોડ અને એસ.પી. રિંગ રોડ જેવા પ્રમુખ માર્ગો પર ઓચિંતી મુલાકાત લઈને કામગીરીની સમીક્ષા કરી હતી.
આ કામગીરીમાં એસઓજી ક્રાઈમ અને અમદાવાદ ક્રાઈમ બ્રાન્ચની ટીમો પણ જોડાઈ હતી. નિકોલ, અમરાઇવાડી, ગોમતીપુરમાં ક્રાઇમ બ્રાન્ચની 200 જેટલા પોલીસ અધિકારીઓ અને કર્મચારીઓની ટીમે મેગા કોમ્બિગ ઓપરેશન હાથ ધર્યું હતું,જેમાં ડ્રગ્સ પેડલર્સ, બુટલેગરો અને હિસ્ટ્રીશીટરોના ઘરો પર રેડ કરવામાં આવી હતી. આ દરમિયાન નાર્કોટિક્સનો 1, આર્મ્સ એક્ટનો 1, પ્રોહિબિશનના 9, વાહન ડિટેઇન 18 સહિત 25 ગુનેગારો વિરૂદ્ધ કાયદેસરની કાર્યવાહી હાથ ધરવામાં આવી છે. હોટસ્પોટમાં સૌથી વધારે પશ્ચિમ એરિયાનો સમાવેશ થયો છે.
જેમાં નાઈટ કલ્ચર માટે જાણીતા વિસ્તારો એવા કે, સિંધુભવન રોડ, એસ.જી. હાઇવે, વસ્ત્રાપુર, સરખેજ અને વેજલપુર જેવા વિસ્તારો પ્રમુખ છે.ચેકિંગ દરમિયાન પોલીસને મોટી સફળતા સાંપડી હતી. સિંધુભવન રોડ પર અશ્વ વિલા ચાર રસ્તા પાસે એક શંકાસ્પદ કિયા સેલ્ટોસ કારમાંથી મિખિલ મનોજભાઈ, શુભમ મુકેશભાઈ અને પાર્થ વિજયભાઈ નામના ત્રણ યુવકોને 4 બિયરના ટીન સાથે ઝડપી લેવાયા હતા. આ ઉપરાંત, જમાલપુર ચાર રસ્તા પાસે ચેકિંગ દરમિયાન અટકાવવામાં આવેલી હ્યુન્ડાઈ i10 કારમાંથી અંદાજે 350 જેટલી કફ સિરપની બોટલો મળી આવતા પોલીસે સમગ્ર જથ્થો કબજે કરી NDPS એક્ટ હેઠળ કાયદેસરની કાર્યવાહી હાથ ધરી છે.
બીજી તરફ, દાણીલીમડાના ફૈઝલનગર બેરલ માર્કેટ વિસ્તારમાં પોલીસનું કોમ્બિંગ ઓપરેશન શરૂ થયું હતું. દાણીલીમડામાં પોલીસનું કોમ્બિંગ શરૂ થતાં જ અસામાજિક તત્વોમાં નાસભાગ મચી ગઈ હતી, જ્યાં પોલીસે સમગ્ર વિસ્તાર ઘેરીને શંકાસ્પદ વ્યક્તિઓની ચકાસણી કરી હતી. અમદાવાદ પોલીસનું કહેવું છે કે શાંતિ અને સલામતી જાળવવા તેમજ નાગરિકોની સુરક્ષા સુનિશ્ચિત કરવા માટે આગામી દિવસોમાં પણ આ પ્રકારે રાત્રિ દરમિયાન સઘન ચેકિંગ અને નાઇટ ડોમિનેશનની કાર્યવાહી સતત ચાલુ રાખવામાં આવશે.
