મહાપાલિકાની TP શાખા દ્વારા સ્માર્ટ ડિમોલીશન : પ્રશ્નો સર્જતું તંત્રઃ રૈયાગામથી સ્માર્ટ સિટી જતા રસ્તાનું કામ ચાલુ ત્યારે હવે રહી રહીને TPને ડિમોલીશન યાદ આવ્યું!
રાજકોટ, : રાજકોટ મહાપાલિકાના મ્યુનિ.કમિશનર, ટી.પી.ઓ. વગેરેના માર્ગદર્શનમાં પૂર્વ ઝોન ટી.પી.વિભાગ, સોલીડ વેસ્ટ, બાંધકામ, ફાયર, વિજીલન્સ, રોશની, દબાણ હટાવ એમ અર્ધો ડઝન ખાતાના સ્ટાફ દ્વારા આજે આજી ડેમ ચોક પાસે માત્ર 3 આરડીનું દબાણ હટાવ્યું હતું અને રૂ. 21.11 કરોડની જમીન ખુલ્લી કર્યાનું જાહેર કરી દીધું છે.
આજી ડેમ ચોકડી પાસે ટ્રાફિક પોલીસ સ્ટેશનની બાજુમાં વોર્ડ નં. 15માં મનપાના 3518.67 ચો.મી.ના પ્લોટમાં આ 3 ઓરડી ખડકાઈ ગઈ હતી પરંતુ, તેને જે તે સમયે યથાવત્ રહેવા દઈને આજે દૂર કરવામાં આવી છે. આ ઉપરાંત વોર્ડ નં. 18માં સીતારામ સોસાયટીના કૂલ 6 રોડ ઉપર થાંભલાઓ ખોડીને આડશ ઉભી કરાઈ હતી જે પણ દૂર કરાયેલ છે.
બીજી તરફ, લાંબા સમય પહેલા રૈયા સીમેન્ટ રોડ જ્યાં પૂરો થાય છે ત્યાંથી સ્માર્ટ સિટી એરિયા સુધીના અત્યંત જર્જરિત રોડનું કામ મંજુર કરાયેલું છે અને હાલ બાંધકામ વિભાગ દ્વારા આ રોડનું કામ ચાલે છે. આ રોડમાં 100 મીટરનો ભાગ 36 મીટર પહોળો છે, 750 મીટરમાં 45 મીટર (દોઢસો ફૂટ) એમ અલગ અલગ સાઈઝનો છે. હવે બાંધકામ વિભાગ આ રોડને 45 મીટર પહોળો કરીને ડેવલપ કરવા રસ્તાનું કામ ચાલે છે ત્યારે વેસ્ટઝોન ટી.પી.વિભાગે અહીં રસ્તા પરના ડીમોલીશન કરવાનું યાદ આવ્યું છે અને નોટિસો અપાતા લોકોમાં વિરોધ જાગ્યો છે. ખરેખર તો રોડની જમીન અગાઉ ખુલ્લી કરાવવાની જરૂર હતી.
