વડોદરાઃ સોશ્યલ મીડિયા પર યુવતીને મેસેજ મોકલનાર યુવક પર યુવતીના પતિ અને તેના બે સાગરીતોએ હુમલો કરતાં માથામાં ઇજા પહોંચી છે.
વડોદરા નજીકની જરોદ ખાતેની આઇટીએમ કોલેજમાં અભ્યાસ કરતા ધુ્રવેશ પંચાલ(અશોક વાટિકા સોસાયટી,ગોરવા) એ પોલીસને કહ્યું છે કે,ચારેક મહિના પહેલાં સોશ્યલ મીડિયા પર મેં એક યુવતીને મેસેજ કર્યો હતો.ત્યારબાદ તેણે મેસેજ નહિ કરવા કહ્યું હતું.
આ બનાવને પગલે તેના પતિ પ્રતીકે મને ફોન કરીને મળવા માટે કહ્યું હતું.જેથી મેં યુવતી અને તેના પતિને બ્લોક કરી દીધા હતા.પરંતુ ત્યાર પછી પણ યુવતીના પતિએ મને ફોન કરીને મળવાનો આગ્રહ રાખ્યો હતો અને નહિં મળે તો કોલેજમાં આવીને માર મારવાની ધમકી આપી હતી.
ગઇ તા.૧૫મીએ બપોરે પ્રતીકનો ફરી ફોન આવતાં મેં તેને સાંજે દશામાના મંદિર પાસે મળવાનું કહ્યું હતું.હું મારા બે મિત્રો સાથે ત્યાં ગયો ત્યારે પ્રતીક તેના સાગરીત સાથે આવ્યો હતો અને મને માર માર્યો હતો. ત્યારબાદ અન્ય એક યુવક પણ આવ્યો હતો અને તેણે પણ મને નીચે પાડી માર માર્યો હતો.જે દરમિયાન પ્રતીકે તેના મારા માથામાં કોઇ તિક્ષણ વસ્તુ વડે હુમલો કરતાં લોહી નીકળ્યું હતું.
યુવકે કહ્યું છે કે,વધુ મારમાંથી બચવા હું ઘર તરફ દોડયો ત્યારે હુમલાખોરોએ મારો પીછો કર્યો હતો.હું ઘર સુધી પહોંચી જતાં તેઓ પાછા ફર્યા હતા.ગોરવા પોલીસે આ બનાવ અંગે ગુનો નોંધ્યો છે.
