વડોદરાઃ વડોદરાના ઉંડેરા વિસ્તારમાં આજે એક મકાનમાં આગ લાગતાં બચાવ માટે દોડી આવેલી મહિલા સહિત બે જણાને ઇજા થઇ હતી.
ઉંડેરાના શ્રીરામ ફળિયામાં એક મકાનના બીજા માળે બંધ મકાનમાંથી ધુમાડા નીકળવા માંડતા લોકો દોડી આવ્યા હતા.થોડી જ વારમાં આગ લાગતાં ઘરવખરી લપેટાઇ હતી.આગ લાગવાનું ચોક્કસ કારણ જાણી શકાયું નથી પરંતુ ફાયર બ્રિગેડ આવે તે પહેલાં લોકોએ આગ બૂઝાવવાનો પ્રયાસ શરૃ કરી દીધો હતો.
જે દરમિયાન એક મહિલાને કરંટ લાગ્યો હતો.પરંતુ અમરસિંહભાઇએ વીજ સપ્લાય બંધ કરી દેતાં મહિલા બચી ગઇ હતી.આ વખતે અન્ય એક વ્યક્તિને પણ ઇજા થઇ હતી.ફાયર બ્રિગેડ આવી ત્યારે રસોડા સુધી આગ પહોંચી જતાં પહેલાં ગેસ સિલિન્ડર કાઢી લીધો હતો.જેથી બીજી હોનારત થતાં રહી ગઇ હતી.
