UP Crime News: ઉત્તર પ્રદેશમાં કાયદો અને વ્યવસ્થાની સ્થિતિ પર ગંભીર સવાલો ઊભા કરતો વધુ એક ચોંકાવનારો કિસ્સો સામે આવ્યો છે. ગાઝિયાબાદમાં પેરા એથ્લીટ ગૌરવ ત્યાગીની ગોળી મારીને હત્યા કરાયાની ઘટના હજુ શાંત થઈ નથી, ત્યાં મેરઠમાં નેશનલ કક્ષાની મહિલા કબડ્ડી ખેલાડી અનુષ્કાની અપહરણ બાદ હત્યા કરવામાં આવી હોવાનો ઘટસ્ફોટ થયો છે. ફાસ્ટ ફૂડની દુકાન ચલાવતા શખસે સામાન્ય બાબતમાં યુવતીનું અપહરણ કર્યું અને તે જ રાત્રે માથામાં ઈંટોના ઘા મારીને તેની હત્યા કરી મૃતદેહને ગટરમાં ફેંકી દીધો હતો. આ ઘટનાના 45 દિવસ બાદ રવિવારે (31મી મે) મોડી રાત્રે આરોપીની ધરપકડ થતાં સમગ્ર હત્યાકાંડ પરથી પડદો ઊંચકાયો છે. પોલીસે આરોપીની કબૂલાતના આધારે ગટરમાંથી અનુષ્કાનો કંકાલ (હાડપિંજર) હાલતમાં મૃતદેહ રિકવર કર્યો છે.
15મી એપ્રિલથી ગુમ હતી ૧૨મા ધોરણની વિદ્યાર્થિની
મૃતક અનુષ્કા મેરઠના દૌરાલા પોલીસ સ્ટેશન વિસ્તારના ચિરૌડી ગામના રહેવાસી નેમ્પલની પુત્રી હતી અને રાષ્ટ્રીય સ્તરે કબડ્ડી રમતી હતી. તે કાંકરખેડાના શોભાપુરા વિસ્તારમાં ભાડાના મકાનમાં રહીને કૃષ્ણા પબ્લિક સ્કૂલમાં ધોરણ 12માં અભ્યાસ કરતી હતી. અનુષ્કા15મી એપ્રિલ 2026ના રોજ રાત્રે અચાનક ગુમ થઈ ગઈ હતી. પુત્રી ઘરે ન પરત ફરતાં પિતા 16મી એપ્રિલે કાંકરખેડા પોલીસ સ્ટેશનમાં ગુમ થયાની ફરિયાદ નોંધાવી હતી.
પોલીસે દોઢ મહિના સુધી કોઈ નક્કર તપાસ ન કરી, જેથી કંટાળીને પરિવારે બે દિવસ પહેલા મેરઠ ઝોનના એડિશનલ ડિરેક્ટર જનરલ ઓફ પોલીસ (ADG) ભાનુ ભાસ્કરને ન્યાય માટે ગુહવાર લગાવી હતી. ADGના કડક આદેશ બાદ પોલીસ એક્શનમાં આવી અને ગણતરીના કલાકોમાં ચંદીગઢથી આરોપી શ્યામ ધનકની ધરપકડ કરી લીધી હતી.
આ પણ વાંચો: ‘ના ના કરતે પ્યાર તુમ્હી સે…’ ફેમ દિગ્ગજ ગાયિકા સુમન કલ્યાણપુરનું 89 વર્ષની વયે નિધન
માત્ર રૂ. 3600ની લેતીદેતીમાં હત્યા
ધરપકડ કરાયેલ આરોપી શ્યામ ધનક મૂળ ઉત્તરાખંડના દેહરાદૂનનો રહેવાસી છે અને મેરઠના રોહતા રોડ પર ફાસ્ટ ફૂડ (ફૂડ કોર્નર)ની દુકાન ચલાવતો હતો. પોલીસ પૂછપરછમાં હત્યા પાછળ જે કારણ સામે આવ્યું તે જાણીને ઉચ્ચ અધિકારીઓ પણ ચોંકી ઉઠ્યા હતા.
અનુષ્કા અવારનવાર તેના મિત્રો સાથે શ્યામની દુકાને ફાસ્ટ ફૂડ ખાવા જતી હતી, જેથી હિસાબ પેટે તેણે શ્યામને આશરે 3,600 રૂપિયા આપવાના નીકળતા હતા. 15મી એપ્રિલની રાત્રે અનુષ્કા એકલી શ્યામની દુકાને પહોંચી ત્યારે શ્યામે પોતાના બાકી રૂપિયા માંગ્યા હતા. આ દરમિયાન અનુષ્કાએ મજાકમાં એવું કહી દીધું કે, ‘જો તું વધારે રૂપિયા માંગીશ તો હું તારા પર છેડતીનો કેસ દાખલ કરાવી દઈશ’. આ સાંભળીને શ્યામ એકદમ ગુસ્સે ભરાયો હતો. તેણે અનુષ્કાનું અપહરણ કર્યું અને તેને પરાણે દારૂ પીવડાવ્યો હતો. ત્યારબાદ તે તેને નિર્જન રોહતા રોડ પર લઈ ગયો અને માથાના ભાગે ઈંટોના ઉપરાઉપરી ઘા મારીને તેને મોતને ઘાટ ઉતારી દીધી. હત્યા કર્યા બાદ પુરાવાનો નાશ કરવાના ઈરાદે તેણે મૃચદેહને રોડ કિનારે આવેલી મોટી ગટરમાં ધકેલી દીધી અને પોતે ચંદીગઢ ભાગી ગયો હતો.
ગટરના ગંદા પાણીમાંથી માત્ર હાડપિંજર મળ્યું
રવિવારે મોડી રાત્રે પોલીસ આરોપી શ્યામને સાથે રાખીને રોહતા રોડ પર ઘટનાસ્થળે પહોંચી હતી. દોઢ મહિના જેટલો લાંબો સમય વીતી ગયો હોવાથી અને ગટરના પાણીના કારણે અનુષ્કાનું આખું શરીર કોહવાઈ ગયું હતું અને માત્ર હાડપિંજર જ બચ્યું હતું. પોલીસે કાયદેસરની કાર્યવાહી કરી હાડપિંજરને ફોરેન્સિક લેબ (FSL) અને ડીએનએ (DNA) ટેસ્ટ માટે મોકલી આપ્યું છે. આ કરપીણ હત્યાકાંડને પગલે સમગ્ર મેરઠ પંથકમાં ભારે રોષ અને અરેરાટી વ્યાપી ગઈ છે, જ્યારે પરિવારે ન્યાયની ગુહાર લગાવી છે.
