પોલીસે બંને મહિલા નર્સ વિરૂદ્ધ ગુનો દાખલ કર્યો
હોસ્પિટલ બહાર દંપતીને મળી ડૉક્ટર સાથે વાત થઈ છે, ગર્ભપાતનો અનુભવ છે કહી નર્સના ઘરે લઈ ગયા : ગર્ભાશયમાં ગંભીર ઈજાઓ પહોંચી
આણંદ: ઉમરેઠ શહેરની વેદ હોસ્પિટલની બે મહિલા નર્સોએ કોઈ પણ ડિગ્રી ના હોવા છતાં નડિયાદની એક પરિણીતાનો રહેણાંક મકાનમાં દવાખાના જેવી રૂમમાં ગેરકાયદે ગર્ભપાત કરી ગર્ભાશયમાં ગંભીર પ્રકારની ઇજાઓ પહોંચાડી હોવાની ઉમરેઠ પોલીસ મથકે ફરિયાદ નોંધાઈ છે. ઉમરેઠ પોલીસે બંને નર્સ વિરુદ્ધ ગુનો નોંધી વધુ તપાસ હાથ ધરી છે.
મૂળ પેટલાદ તાલુકાના રાવલી ગામના વતની અને હાલ નડિયાદ ખાતે રહેતા મહંમદ અશ્ફાકમિયા મહેબૂબમિયા મલેકની પત્ની સાઈન બીબીને પેટમાં દુઃખાવો થતાં નડિયાદની એન.ડી. દેસાઈ હોસ્પિટલમાં સોનોગ્રાફી કરાવતા ત્રણ માસનો ગર્ભ હોવાનું તબીબે જણાવ્યું હતું. તા. ૧૮ જુલાઈએ સાઇન બીબી નણંદ કરિશ્મા બાનુ સાથે ઉમરેઠની વેદ હોસ્પિટલમાં તપાસ અર્થે ગયા હતા. જ્યાં વેદ હોસ્પિટલમાં નર્સ તરીકે ફરજ બજાવતી હિરલબેન કેતનકુમાર પટેલ રહે. ખારવા વાડી, ઉમરેઠ અને સુમનબેન ઇગ્નાશભાઈ ખ્રિસ્તી રહે. આશા કુંજ સોસાયટી, ઉમરેઠવાળા તેમને હોસ્પિટલ બહાર મળ્યા હતા. ડોક્ટર સાહેબ સાથે વાત થયેલી છે મને ગર્ભપાત કરવાનો અનુભવ છે કહી રૂા. ૧૬,૦૦૦માં ગર્ભપાત કરાવવાનું નક્કી થયું હતું.
મહંમદ અશફાક પૈસા આપતા બંને નર્સો સાઇન બીબી તથા તેણીના પતિ અને બહેનને લઈ વેદ હોસ્પિટલની પાછળ આશા કુંજ સોસાયટીમાં સુમનબેનના ઘરે લઈ ગયા હતા. જ્યાં ઘરના ઉપરના ભાગે દવાખાના જેવી એક રૂમમાં સાઈન બીબીને ત્રણ કલાક સુધી સુમનબેને ગર્ભપાત કરી ગર્ભનો નિકાલ કરી ત્રણેક દિવસની દવા આપી દવા પૂરી થાય એટલે વેદ હોસ્પિટલમાં આવી સોનોગ્રાફી કરીશું તેમ કહ્યું હતું. બાદમાં તા. ૨૩મી જુલાઈએ ઉમરેઠ આવ્યા હતા.
જ્યાં હિરલબેન ઉમરેઠની સોહમ હોસ્પિટલમાં લઈ ગયા હતા અને સોનોગ્રાફી કરાવતા તબીબે પત્નીના પેટમાં બગાડ રહી ગયેલો છે તેમ કહી દવા આપી હતી. ૨૮મીએ પણ બગાડ રહી ગયો હોવાનું જણાવ્યું હતું. બાદમાં પતિ- પત્ની બંને સુમનબેનના ઘરે ગયા હતા જ્યાં હિરલબેન પણ હાજર હતા. જ્યાં બે કલાક જેટલો સમય રૂમમાં થયો હતો. સાઈન બીબીને તકલીફ વધારે અને બ્લિડિંગ વધતા સોહમ હોસ્પિટલમાં લઈ ગયા હતા. જ્યાં સાઇન બીબીને ગર્ભાશયમાં નુકસાન થયું હોવાનું અને તાત્કાલિક ઓપરેશન કરાવવું પડશે તેમ ડોક્ટરે જણાવ્યું હતું. તે પેટે ૬૦,૦૦૦ની જરૂર પડશે તેમ કહ્યું હતું. અશફાક મિયાંએ સુમન બેનને તેઓ વેદ હોસ્પિટલમાં નોકરી કરતા હોય પત્નીની ત્યાં સારવાર કરવા કહ્યું હતું પરંતુ, સુમનબેને સાઈન બીબીને નડિયાદની એન.ડી. દેસાઈ હોસ્પિટલમાં દાખલ કરાવી ગર્ભાશયનું ઓપરેશન કરાવ્યું હતું. આ અંગે મહમ્મદ અશફાક મિયા મલેકે ઉમરેઠ પોલીસ મથકમાં ફરિયાદ નોંધાવતા પોલીસે બંને નર્સો વિરુદ્ધ ગુનો નોધી વધુ તપાસ હાથ ધરી છે.
