વડોદરાઃ એમ.એસ.યુનિવર્સિટીના કોમ્પ્યુટર સેન્ટર દ્વારા ડેવલપ કરવામાં આવેલી એમએસયુ આઈએસ( ઈન્ફર્મેશન સિસ્ટમ)ને આગળ ધપાવવા માટે બીજા પાંચ વર્ષનું એક્સ્ટેન્શન આપતા પહેલા પ્રોજેકટને રિવ્યૂ કરવા માટે યુનિવર્સિટી સત્તાધીશોએ એક કમિટિ બનાવી છે.આ કમિટિના નિર્ણયના આધારે યુનિવર્સિટીના કોમ્પ્યુટર સેન્ટરનું ભવિષ્ય નક્કી થશે.
સૂત્રોના જણાવ્યા અનુસાર જમ્બો કમિટિમાં ૧૯ સભ્યોનો સમાવેશ કરવામાં આવ્યો છે.ઉલ્લેખનીય છે કે, કોમ્પ્યુટર સેન્ટરમાં એમએસયુ આઈએસ સિસ્ટમના ભાગરુપે વિદ્યાર્થીઓના ઓનલાઈન એડમિશન સહિતની બીજી કામગીરી કરવામાં આવે છે.પાંચ વર્ષ દરમિયાન આ સિસ્ટમ માટે સેન્ટરમાં રાખવામાં આવેલા કર્મચારીઓના પગાર સહિત લગભગ ૩ કરોડ રુપિયાનો ખર્ચ થયો છે.
હવે તેને આગળ વિકસાવવા માટે સૈધ્ધાંતિક મંજૂરી તો અપાઈ છે પણ તેનું ફંડ રિલિઝ કરાયું નથી.બીજી તરફ આ મુદ્દે સર્જાયેલા મતભેદો બાદ સેન્ટરના ડાયરેકટર પદેથી પ્રો.અપૂર્વ શાહ અને ડેપ્યુટી ડાયરેકટર પદેથી પ્રો.વિરલ કાપડિયા રાજીનામુ આપી ચૂકયા છે.જોકે આ રાજીનામુ હજી મંજૂર કરાયું નથી.
સત્તાધીશોએ હવે વચલો રસ્તો અપનાવીને ફંડ રિલિઝ કરતા પહેલા એમએસયુ આઈએસ પ્રોજેકટને રિવ્યૂ કરવા માટે કમિટિ બન ાવી છે.જેના કન્વીનર તરીકે સાયન્સ ફેકલ્ટીના ડીન પ્રો.કલમકરની નિમણૂક કરવામાં આવી છે.આ કમિટિ પોતાનો અહેવાલ આપશે તે બાદ આગળનો નિર્ણય લેવાશે.
