વડોદરા : ખૂન, ખૂનની કોશિશ, રાયોટિંગ,
મારામારી, ધમકી અને દારૃની પ્રવૃત્તિઓ આચરી આતંકનો માહોલ ઉભો કરનારી ચૂંઇ
ગેંગના સાત સાગરીતો સામે ગુજસીટોક હેઠળ ગુનો દાખલ કરવામાં આવ્યા બાદ ગેંગના લીડર
સુરજ કહાર અને અન્ય એક સાગરીક કૃણાલ કહારે જામીન અરજી મુકતા અદાલતે બન્ને આરોપીની
જામીન અરજી નામંજૂર કરી હતી.
કેસની વિગત એવી છે કે, તાજેતરમાં સૂરજ કહારે પોલીસની હાજરીમાં જ પોલીસ
સ્ટેશનમાં ફરિયાદ કરવા આવેલા યુવકને મોંઢા પર ફેંટ મારી દઇ જાનથી મારી નાંખવાની
ધમકી આપતા આ બનાવે ભારે ચર્ચા જગાવી હતી. પોલીસે બનાવની ગંભીરતાને ધ્યાનમાં લઇ
તપાસ હાથ ધરી ચૂંઇ ગેંગની તપાસ શરુ કરી હતી. આ ગેંગ સામે દસ વર્ષમાં ૧૨૮ ગુના દાખલ
થયા હોવાની વિગતો સપાટી પર આવી હતી.
પોલીસે આ સંગઠીત ગેંગ સામે ગુજસીટોક મુજબનો ગુનો દાખલ કરી ગેંગ
લીડર સૂરજ ઉર્ફે ચૂઇ રમણલાલ કહાર અને ગેંગના સાગરીત દિપક દશરથભાઇ કહાર,પાર્થ
ઉર્ફે સોનુ રાજુભાઇ બ્રહ્મભટ્ટ, પ્રદિપ ઠાકોરભાઇ ઠક્કર,
રવિ સુભાષભાઇ માછી અને કૃણાલ રમણભાઇ કહારની ધરપકડ કરી હતી. જ્યારે આ
ગુનામાં હજી અરુણ માછી નામનો શખ્સ ફરાર છે. તમામ આરોપીને એક જ જેલમાં રાખવામાં
આવ્યા હોઇ અગાઉ સરકાર તરફે આરોપીની જેલ ટ્રાન્સફરની અરજી કરવામાં આવતા કોર્ટે તમામ
આરોપીને અલગ અલગ જેલમાં મોકલી આપવાનો આદેશ કર્યો હતો.
દરમિયાનમાં ગેંગ લીડર સુરજ ઉર્ફે ચૂઇ રમણભાઇ કહાર અને કૃણાલ
રમણભાઇ કહારે જામીન અરજી મુકતા તેની સુનાવણીમાં સ્પેશ્યલ સરકારી વકીલ રઘુવીર
પંડયાએ રજૂઆત કરી હતી કે, આરોપીને જો જામીન આપવામાં આવશે તો ભયનો માહોલ
ફેલાશે, પુરાવા સાથે ચેડા થશે અને ફરી આરોપીઓ ગુના આચરશે.
બન્ને આરોપી સામે હત્યા, હત્યાનો પ્રયાસ
સહિતના ગંભીર ગુનાઓ નોંધાયેલા છે.બનાવમાં સંડોવાયેલ આરોપી અરુણ માછી હજી ફરાર છે.
ન્યાયાધીશે બન્ને પક્ષની રજૂઆત સાંભળ્યા બાદ બન્ને આરોપીની જામીન અરજી રદ કરી હતી.
