વડોદરાઃ એમ.એસ.યુનિવર્સિટીના પૂર્વ વાઈસ ચાન્સેલર ડો.વિજય શ્રીવાસ્તવની પીએચડીની ડિગ્રી બોગસ હોવાનો સ્ફોટક આક્ષેપ યુનિવર્સિટીની એજ્યુકેશન સાયકોલોજી ફેકલ્ટીના વરિષ્ઠ પ્રોફેસર સતિષ પાઠકે કર્યો છે.પ્રો.પાઠકે રજિસ્ટ્રારને પત્ર લખીને ડો.શ્રીવાસ્તવ સામે પોલીસ ફરિયાદ કરવામાં આવે તેવી માગ કરી છે.
પ્રો.પાઠકે જ હાઈકોર્ટમાં ડો.શ્રીવાસ્તવના પ્રોફેસર તરીકેના અનુભવને પડકારતી અરજી કરી હતી.તેમણે કહ્યું હતું કે, ડો.શ્રીવાસ્તવે હાઈકોર્ટમાં રજૂ કરેલા સોગંદનામાની સાથે ઝાંસીની બુંદેલખંડ યુનિવર્સિટીની પીએચડી ડિગ્રીની કોપી પણ રજૂ કરી છે.આ ડિગ્રી તેમણે ૨૦૦૦ની સાલમાં પ્રાપ્ત કરી હોવાનો ઉલ્લેખ તેમાં છે.આ અંગે મેં બુંદેલખંડ યુનિવર્સિટીમાં ડિગ્રીનું ઓનલાઈન વેરિફિકેશન કરાવ્યું હતું અને તેમાં યુનિવર્સિટીએ લેખિતમાં જવાબ આપ્યો છે કે, આ ડિગ્રી યુનિવર્સિટી દ્વારા આપવામાં આવી નથી અને તે બોગસ છે.આમ ફરી એક વખત સાબિત થયું છે કે, ડો.શ્રીવાસ્તવે વાઈસ ચાન્સેલર બનવા માટે રજૂ કરેલા બાયોેડેટામાં ખોટી જાણકારી આપી હતી અને તેની સાથે સાથે હાઈકોર્ટમાં પણ તેઓ ડિગ્રી અંગે ખોટું બોલ્યા છે.પ્રો.પાઠકે કહ્યું હતું કે, યુનિવર્સિટીના નિયમ પ્રમાણે રજિસ્ટ્રાર મુખ્ય વહીવટી અધિકારી અને યુનિવર્સિટીના રેકોર્ડના કસ્ટોડિયન છે એટલે તેમણે યુનિવર્સિટી સાથે છેતરપિંડી કરવા બદલ ડો.શ્રીવાસ્તવ સામે પોલીસ પરિયાદ દાખલ કરવી જોઈએ તેમજ તેમણે વાઈસ ચાન્સેલર તરીકે અત્યાર સુધીમાં જે પણ પગાર, ભથ્થા અને નાણાકીય લાભ મેળવ્યા છે તેની રિકવરી કરવામાં આવે.
રજિસ્ટ્રાર ફરિયાદ નહીં કરે તો કોર્ટમાં જઈશ
પ્રો.પાઠકે કહ્યું હતું કે, એમ.એસ.યુનિવર્સિટીને ન્યાય મળે તે બહુ જરુરી છે. રજિસ્ટ્રાર ડો.ચૂડાસમા પોલીસ ફરિયાદ નહીં કરે તો હું પોલીસ ફરિયાદની માંગ સાથે કોર્ટમાં અપીલ કરીશ.
પ્રો.પાઠકે ડો.વિજય શ્રીવાસ્તવ સામે હાઈકોર્ટમાં અપીલ કરી તે પહેલા સયાજીગંજ પોલીસ મથકમાં પણ ડો.શ્રીવાસ્તવના બાયોડેટાની તપાસ કરવા માટે અરજી કરી હતી.જોકે આ તપાસ હજી પણ પેન્ડિંગ છે.પ્રો.પાઠક હાઈકોર્ટમાં ગયા હોવાથી તેના પર આગળ કાર્યવાહી થઈ નથી.
ઉલ્લેખનીય છે કે, પ્રો.પાઠકે તાજેતરમાં જ હાઈકોર્ટમાં ડો.શ્રીવાસ્તવ સામે તેમના પ્રોફેસર તરીકેના અનુભવના મુદ્દે કરેલી અરજી પાછી ખેંચી લીધી છે.
