મુંબઈ : સપ્ટેમ્બરમાં વિક્રમી સંખ્યા દર્શાવ્યા બાદ ઓકટોબરમાં ઈ-વે બિલ્સ જનરેટ કરવાની માત્રા ૪ ટકા જેટલી નરમ પડી ૧૨.૬૮ કરોડ રહી હતી. જો કે ગત મહિને ઈ-વે બિલ્સની સંખ્યામાં વાર્ષિક ધોરણે ૮.૨૦ ટકા વધારો થયો હતો.
સપ્ટેમ્બરમાં ઈ-વે બિલ્સ જનરેટ થવાની સંખ્યા ૧૩.૨૦ કરોડ સાથે વિક્રમી રહી હતી. નવરાત્રીના પ્રારંભ સાથે દેશમાં ગુડસ એન્ડ સર્વિસીઝ ટેકસ (જીએસટી)માં ઘટાડા સાથે સપ્ટેમ્બરના અંતિમ સપ્તાહમાં માલસામાનની હેરફેરમાં વધારો જોવા મળ્યો હતો.
દિવાળી પહેલા સ્ટોક કરવા ટ્રેડરો દ્વારા માલસામાનની મોટેપાયે ખરીદી કરાઈ હતી. ઓકટોબરના ઈ-વે બિલ્સની સંખ્યા અત્યારસુધીની ચોથી મોટી સંખ્યા રહી છે. વેરા દરમાં જ્યારે જ્યારે ફેરબદલની કવાયત થાય છે ત્યારે ઉદ્યોગો દ્વારા માલસામાનની ડિલિવરી યા તો વહેલી કરવામાં આવે છે અથવા તો તેમાં ઢીલ કરવામાં આવે છે.
વર્તમાન વર્ષના સપ્ટેમ્બરની ૨૨મીથી અસંખ્ય ચીજવસ્તુઓ પરના જીએસટીના દરમાં નોંધપાત્ર ઘટાડો કરાયો હતો.
ઈ-વે બિલ્સની ઊંચી માત્રાનો અર્થ ઉદ્યોગો ફરજપાલન કરવામાં ગંભીર હોવાનો થાય છે એમ એક વેરા નિષ્ણાતે જણાવ્યું હતું.
